د افغانستان د بېلابېلو ولایتونو اوسېدونکي شکایت کوي چې طالبانو پرون او نن د دوکانونو او ترانسپورټي وسایطو پر سر د طالبانو د بیرغ نه لګولو له امله ګڼ کسان نیولي او توقیف کړي دي.
ځایي سرچینې، چې نه غواړي نومونه یې واخیستل شي، وايي چې د طالبانو امنیتي او شرطي ځواکونو خلک د جبر او اجبار له لارې د بیرغ لګولو ته اړ باسي او هڅه کوي چې دا کار د خلکو له لوري د داوطلبانه اقدام په توګه څرګند شي.
د سرچینو په وینا، که کوم دوکاندار، موټرچلوونکی یا ریکشاچلوونکی پر خپل شخصي دوکان یا وسیله د طالبانو بیرغ ونه لګوي، له تحقیر، زور زیاتي او د نیول کېدو له ګواښ سره مخ کېږي.
دوی زیاتوي چې په ځینو سیمو کې د بیرغ نه لګول د نیول کېدو او توقیف لامل ګرځېدلي، خو د دغو ادعاوو په اړه تر دې دمه د طالبانو رسمي غبرګون نه دی خپور شوی.
د طالبانو له واک ته بېرته رسېدو وروسته د ملي بیرغ او نورو ملي نښو په اړه محدودیتونه او د طالبانو د بیرغ د کارولو هڅې د افغانستان د سیاسي او ټولنیزو بحثونو له مهمو موضوعاتو څخه پاتې شوي دي.
لیکوال:سعید سمیر
