طالبانو د چهارشنبې په ماښام، د چنګاښ په درېیمه، د هرات ښار د «۶۴ متره سړک» په سیمه کې یو شمېر ښځې نیولې دي. عیني شاهدان وایي چې څو ښځې یې د طالبانو په یوه کاسټر ډوله موټر کې لیدلې دي، خو د نیول شویو کسانو کره شمېر لا نه دی معلوم.
ویل کېږي چې دغه نیونې د دولتي ادارو له رسمي کاري وخت وروسته او د شپې له خوا ترسره شوي دي.
په هرات کې د ښځو د نیولو لړۍ د غبرګولي له شپاړسمې نېټې راهیسې روانه ده او پراخ کورني او نړیوال غبرګونونه یې راپارولي دي.
د دغو نیونو پر ضد د اعتراضونو په ترڅ کې، د غبرګولي په نولسمه نېټه د هرات ښار د جبرئیل ښارګوټي په سیمه کې لږ تر لږه دوه کسان وژل شوي وو.
له دغو پېښو وروسته، د ملګرو ملتونو د مرستندویه پلاوي دفتر (یوناما) له طالبانو غوښتي چې بشري حقونو، د تګ راتګ ازادۍ او د قانون پر وړاندې د ټولو وګړو د برابرۍ اصل ته درناوی وکړي او د جامو او پوښښ له امله د ښځو نیول پای ته ورسوي.
همدارنګه، د بشري حقونو نړیوال سازمان او د بښنې نړیوال سازمان له طالبانو غوښتي چې په هرات کې د اعتراض کوونکو پر وړاندې د زور کارول سمدستي ودروي، نیول شوي کسان خوشې کړي او د ښځو او نجونو حقونو ته درناوی وکړي. په دغو حقونو کې د تګ راتګ ازادي، د بیان ازادي او د سولهییزو غونډو او اعتراضونو حقونه شامل دي.
لیکوال:سعید سمیر
