ځايي سرچینې وايي، طالبانو د هلمند په ګرمسیر ولسوالۍ کې د دغه ولایت د اوومې لوا پر سیمه د څارنې پر مهال یوه بېپیلوټه کشفي الوتکه نسکوره کړې ده.
د سرچینو په وینا، یاده الوتکه د پنجشنبې په ورځ د طالبانو د اوومې لوا پر سر د الوتنې پر مهال د طالبانو په ډزو کې رانسکوره شوې ده.
تر اوسه په رسمي ډول نه ده روښانه شوې چې دغه بېپیلوټه الوتکه د کوم هېواد اړوند ده، خو طالبانو ته نږدې رسنیو راپور ورکړی چې الوتکه د پاکستان اړوند وه.
دا الوتکه داسې مهال نسکوره شوې چې تېره شپه د کندهار، پکتیا او خوست پر ځینو سیمو د پاکستان د پوځ د هوايي بریدونو راپورونه ورکړل شوي دي.
د طالبانو ویاند ذبیحالله مجاهد ویلي، په دغو هوايي بریدونو کې څلور ملکي کسان وژل شوي دي. هغه دغه بریدونه «ښکاره تجاوز» بللي او خبرداری یې ورکړی چې د پاکستان د پوځ پر وړاندې به په «مناسب وخت» کې ځواب ورکړل شي.
مجاهد د پاکستان د دې ادعا په اړه چې ګواکي له افغانستانه پاکستان ته د ډرون الوتکو د اوښتو هڅه شوې، ویلي چې دا ادعاوې د هوايي بریدونو د توجیه لپاره مطرح شوي دي.
طالبانو تر اوسه په رسمي ډول د هلمند په ګرمسیر کې د بېپیلوټه الوتکې د نسکورولو په اړه څه نه دي ویلي.
لیکوال:سعید سمیر
