د روغتیا نړیوال سازمان په افغانستان کې اعلان کړی چې د ولادي فسټولا ناروغۍ بشپړه درملنه په کابل او کندهار ښارونو کې په وړیا توګه وړاندې کوي. دې سازمان ټینګار کړی چې «فسټولا په بشپړه توګه د درملنې وړ ده او هېڅ ښځه باید له حیاتي روغتیايي خدمتونو بېبرخې پاتې نه شي.»
د دې ادارې د اعلان له مخې، هغه ښځې او نجونې چې په دې ناروغۍ اخته دي، کولی شي په کابل او کندهار کې ټاکل شويو روغتیايي مرکزونو ته په مراجعه کولو سره د درملنې له بشپړو او وړیا خدمتونو څخه ګټه واخلي.
ولادي فسټولا په پرمختیايي هېوادونو کې د زېږون له تر ټولو جدي عوارضو څخه ګڼل کېږي. دا ناروغي معمولاً د اوږدمهاله او سخت زېږون او د مناسبې روغتیايي پاملرنې د نشتوالي له امله رامنځته کېږي، چې د مثانې او مهبل یا د کولمو او مهبل ترمنځ غیرطبیعي سوری پیدا کوي.
د دې ستونزې له امله ناروغانې د ادرار یا غایطه موادو له دوامدار بهېدو سره مخ کېږي؛ داسې حالت چې نه یوازې جدي روغتیايي ستونزې او بېلابېلې انتانات رامنځته کوي، بلکې د ښځو لپاره پراخې ټولنیزې او رواني ستونزې هم له ځان سره لري. دا ناروغي تر ډېره په کلیوالو او محرومو سیمو کې ځوانې ښځې اغېزمنوي.
د روغتیا نړیوال سازمان ټینګار کړی چې ولادي فسټولا د یوې نسبتاً ساده جراحي له لارې یې په بشپړه توګه درملنه کېدای شي.
د اعلان له مخې، د فسټولا درملنیز خدمتونه په کابل کې د رابعه بلخي روغتون او په کندهار کې د میرویس حوزوي روغتون کې وړاندې کېږي، او د نورو ولایتونو ناروغانې هم کولی شي د درملنې لپاره دغو مرکزونو ته مراجعه وکړي.
دا پروګرام په افغانستان کې د میندو او ماشومانو د روغتیا د ښه والي لپاره د روغتیا نړیوال سازمان د پراخو هڅو یوه برخه بلل شوې ده؛ هغه پروګرام چې د اسلامي پراختیايي بانک په ګډون د نړیوالو شریکانو په مالي او تخنیکي ملاتړ عملي کېږي.
د ملګرو ملتونو د نفوس صندوق مخکې ویلي وو چې افغانستان د ولادي فسټولا د پېښو له پلوه د نړۍ پنځم هېواد دی. د دې ادارې په وینا، شاوخوا ۱۵ زره ښځې په افغانستان کې له دې روغتیايي ستونزې سره ژوند کوي.
ملګرو ملتونو خبرداری ورکړی چې ولادي فسټولا کولی شي د ښځو د فزیکي معلولیت او ټولنیزې انزوا لامل شي، او ټینګار یې کړی چې د دې ناروغۍ مخنیوی او درملنه حیاتي اهمیت لري. دغه سازمان همدارنګه په افغانستان کې د ښځو لپاره روغتیايي خدمتونو، خوندي جراحۍ او اړینو تجهیزاتو ته د لاسرسي پر اړتیا ټینګار کړی دی.
لیکواله:سلیمه آریایي
