درې افغان وګړي د ایران په شمال کې د بابلسر ښار پر ساحل کې د جمعې ماښام د لامبو وهلو پر مهال ډوب او مړه شوي دي. ژغورونکو له څو ساعتونو پلټنې وروسته د درې واړو کسانو جسدونه د ساحل په بېلابېلو برخو کې موندلي دي. یو بل افغان وګړی چې له هغوی سره اوبو ته داخل شوی و، له دې پېښې ژوندی ژغورل شوی دی.
دا پېښه د جمعې ماښام شاوخوا ۱۰:۳۰ بجې، د وږي په ۶مه، د مازندران ولایت د بابلسر ښار د «سنګچین» د اسکله په سیمه کې رامنځته شوې ده. د بابلسر د ژغورنې او غوطهورۍ د ادارې مشر، مهدي حبیباللهپور، ویلي چې څلور افغان وګړي د لامبو وهلو لپاره د کسپین سمندرګي اوبو ته داخل شوي وو.
د حبیباللهپور په وینا، له دغو څلورو کسانو څخه یو د خپل فزیکي حالت له امله له خپلو درېیو ملګرو وروسته پاتې شوی و. هغه څه موده وروسته ولیدل چې ملګري یې نور په سیمه کې نشته. نوموړی له اوبو راووت او د خپلو درېیو ملګرو د ورکېدو موضوع یې د ژغورنې ادارې ته هبر ورکړ.
د بابلسر د بېړنیو خدماتو مسئول، سید کاظم جلیلیان، هم ویلي چې له څلورو افغان وګړو څخه یو کس په لومړیو شېبو کې له اوبو ژغورل شوی و. وروسته له هغې چې د درېیو نورو کسانو د ورکېدو خبر ورکړل شو، د هغوی د موندلو لپاره د ساحل په بېلابېلو برخو کې د لټون عملیات پیل شول او ژغورونکو څو ساعته خپلو پلټنو ته دوام ورکړ.
د لومړي قرباني جسد د شنبې په ماښام د بابلسر د «سنګچین» په ساحل کې وموندل شو. د دویم افغان وګړي جسد هم د همدې ورځې په ماښام د لامبو وهلو په ممنوعه سیمه کې، د اسکله ترڅنګ، وموندل شو. خو د درېیم کس د موندلو لپاره د لټون عملیات لا هم روان دي.
د درېیم قرباني د موندلو عملیات د یکشنبې په ورځ هم دوام وکړ. ژغورونکو له څو ساعتونو پلټنې وروسته د هغه جسد د بابلسر د «علیآباد میر» سیمې په ساحل کې وموند. په دې سره د ټولو درېیو قربانیانو د موندلو عملیات پای ته ورسېدل.
ایراني چارواکو تر اوسه د درېیو قربانیانو د نومونو، عمرونو او اصلي استوګنځایونو په اړه جزئیات نه دي خپاره کړي. خپاره شوي راپورونه یوازې ښيي چې دغه کسان د افغانستان اتباع وو او له یو بل سره یوځای د لامبو وهلو لپاره د کسپین سمندرګي اوبو ته داخل شوي وو.
دا په وروستیو میاشتو کې د مازندران ولایت په ساحلونو کې د افغان وګړو د ډوبېدو دویمه مرګونې پېښه بلل کېږي. د چنګاښ په ۴مه هم درې افغان وګړي د نوشهر ښار په ساحل کې په یوه ممنوعه سیمه کې د لامبو وهلو پر مهال ډوب شوي وو. په هغه پېښه کې د همدې ډلې پنځه نور غړي ژغورل شوي وو.
لیکواله:سلیمه آریایي
