د طالبانو د دولتي شرکتونو عمومي ریاست اعلان کړی چې د افغان پست د اجرائیوي رئیس، رحمتالله مکي، په مشرۍ درې کسیز پلاوی د تایلنډ پلازمېنې بانکوک ته تللی، څو د آسیا د پوستي کانګرس په څوارلسمه غونډه کې ګډون وکړي.
دغه ریاست د شنبې په ورځ، د وږي په اوومه، اعلان وکړ چې د اسیا څوارلسم پوستي کانګرس د آسیا د پوستي اتحادیې د ۳۲ غړو هېوادونو د پوستي ادارو د استازو او د یو شمېر نړیوالو بنسټونو په ګډون په بانکوک کې جوړېږي.
د دغه ریاست د معلوماتو له مخې، په دې غونډه کې به د پوستي خدمتونو د پراختیا او معیاري کولو، د نړیوالو همکاریو د پراخولو، په پوستي او ګمرکي چارو کې د همغږۍ او د پوستي خدمتونو د کیفیت د لوړولو په اړه بحث او خبرې وشي.
د طالبانو د دولتي شرکتونو عمومي ریاست زیاته کړې چې د افغان پست پلاوی به د غونډې په څنډه کې د بېلابېلو هېوادونو له استازو سره د پوستي همکاریو د پراختیا او په دې برخه کې د ګډو فرصتونو په اړه خبرې وکړي.
لیکواله:سلیمه آریایي
