د امریکا د مالیې وزیر، سکاټ بسنټ، د جي۲۰ ډلې په غونډه کې وویل چې ایران د هغه څه له امله چې نوموړي د دغه هېواد «اقتصادي ماته» وبلله، هڅه کوي دا وضعیت د پوځي بریدونو له لارې جبران کړي.
بسنټ همداراز له اروپايي ټولنې څخه د هغه څه له امله مننه وکړه چې نوموړي پر ایران د امریکا د «اقتصادي انزوا عملیات» وبلل.
هغه وویل چې اروپايي هېوادونو په «روښانه او قاطع» دریځ کې له دې عملیاتو څخه خپل ملاتړ اعلان کړی دی.
امریکا په دې وروستیو کې اعلان کړی چې د ایران د «اقتصادي انزوا» لپاره یې یو کمپاین پیل کړی او غواړي هغه لوري هم د ثانوي بندیزونو په چوکاټ کې په نښه کړي چې له ایران سره سوداګري کوي.
د جي۲۰ ډلې د اقتصاد وزیرانو او د مرکزي بانکونو د مشرانو غونډه د امریکا په کوربهتوب داسې مهال ترسره کېږي چې له څو اوونیو وروسته د ایران او امریکا ترمنځ پوځي نښته یو ځل بیا شدیده شوې ده.
بسنټ وروسته وویل چې ایراني چارواکو د امریکا بندیزونه «جدي» نیولي دي او اغېزې یې د هغوی په وروستیو څرګندونو کې لیدل کېدای شي.
هغه همداراز ادعا وکړه چې د ایران په یو شمېر پټرولپمپونو کې اوږده کتارونه جوړ شوي او خلک د تېلو د ترلاسه کولو لپاره له درېیو تر څلورو ساعتونو پورې انتظار باسي.
د امریکا د مالیې وزیر ټینګار وکړ چې واشنګټن به پر ایران اقتصادي فشارونو ته دوام ورکړي، خو د امریکا هدف د ایران د اقتصاد ړنګول نه دي؛ بلکې موخه یې د اسلامي جمهوریت د تګلارې بدلول دي.
بسنټ همداراز وویل چې د هغه په باور، په دې برخه کې یو «مهم بدلون» نږدې دی.
د امریکا د تېرې شپې له برید او د ایران له ځواب وروسته، متحده عربي اماراتو په سیمه کې د شخړو د لا پراخېدو د خطر په اړه خبرداری ورکړی دی.
په همدې حال کې، د سیمهییزو ترینګلتیاوو د پراخېدو اندېښنې په نړیوالو بازارونو کې د تېلو د بیو د لوړېدو لامل شوي دي.
لیکواله:سلیمه آریايي
