بلخ ولایت کې ځايي سرچینې وايي، د مزارشریف ښار، د دې ولایت په مرکز کې، یو ځوان د ډزو له امله خپل ژوند له لاسه ورکړی دی.
د یوې سرچینې په وینا، دغه ځوان «بېګزاد رسولي» نومېده او د چهارشنبې په ورځ، د زمري ۷مه، د مزارشریف ښار د څلورمې امنیتي حوزې په مربوطاتو کې وژل شوی دی.
سرچینې زیاته کړې چې بېګزاد رسولي د مزارشریف ښار په یوه سوداګریز مرکز کې کار کاوه او د دندې پر مهال د خپل یوه همکار له خوا پرې ډزې شوي چې په پایله کې یې نوموړي ژوند له لاسه ورکړ.
د سرچینې د معلوماتو له مخې، بېګزاد رسولي د جوزجان ولایت د مرکز شبرغان ښار اصلي اوسېدونکی و او د کار لپاره په مزارشریف کې اوسېده.
تر اوسه د دغه وژنې لامل او انګېزه نه ده څرګنده شوې. د بلخ ولایت طالب چارواکو هم د دې پېښې په اړه تر اوسه کومه څرګندونه نه ده کړې.
لیکواله:سلیمه آریایي
