په کنړ ولایت کې ځایي سرچینې وايي چې نامعلومو کسانو یو ماشوم په اسعدآباد ښار، د دې ولایت په مرکز کې، وژلی دی.
د سرچینو په وینا، دغه ماشوم پرون تښتول شوی و او نن یکشنبه، د ثور ۲۰مه، د اسعدآباد ښار د نوآباد سیمې څخه د هغه مړی موندل شوی دی.
سرچینو زیاته کړې چې د دې ماشوم نوم «عثمان» و او تر اوسه د هغه د تښتولو او وژلو دلیل معلوم نه دی.
د ځایي سرچینو د معلوماتو پر اساس، د دې ماشوم کورنۍ له هېچا یا کومې ډلې سره دښمني نه درلوده او د دې پېښې علت لا هم نه دی څرګند.
په کونړ ولایت کې د طالبانو ځایي چارواکو تر اوسه په دې پېښه کومه تبصره نه ده کړې.
له هغه راهیسې چې طالبان بیا واک ته رسېدلي، په افغانستان کې په بېلابېلو ولایتونو کې د ماشومانو د تښتونې او وژنې څو پېښې ثبت شوي دي.
دغه پېښې په داسې حال کې دوام لري چې طالبانو څو ځله په افغانستان کې د ټولیز امنیت د تأمین ادعا کړې ده.
لیکواله:سلیمه آریایي
