احمد مسعود، د افغانستان د ملي مقاومت جبهې مشر، په یوه ګډه مقاله کې له اورلین پرادیه، د فرانسې د پارلمان له غړې سره، له اروپايي اتحادیې وغوښتل چې له طالبانو سره د اړیکو له عادي کولو او د افغان کډوالو د بېرته ستنولو لپاره له دې ډلې سره له همکارۍ ډډه وکړي. لیکوالانو خبرداری ورکړی چې له طالبانو سره هر ډول سیاسي تعامل کولای شي دې ډلې ته مشروعیت ورکړي او نورو افراطي ډلو ته اندېښمنوونکی پیغام ولېږي.
دا مقاله د دوشنبې په ورځ د فرانسې په «لوموند» ورځپاڼه کې خپره شوه. احمد مسعود او اورلین پرادیه په دې مقاله کې د طالبانو په اړه د اروپايي اتحادیې پر وروستۍ تګلارې نیوکه کړې او ټینګار یې کړی چې افغان کډوال اروپا ته ګواښ نه دي، بلکې له هغه حکومت څخه تښتېدلي دي چې د دوی په وینا په افغانستان کې د پراخو ځپنو او محدودیتونو له لارې واک چلوي.
لیکوالانو په بروکسل کې د اروپايي اتحادیې د چارواکو او د طالبانو د پلاوي ترمنځ وروستیو ناستو ته اشاره کړې، چې پکې د افغان کډوالو د بېرته ستنولو، قونسلي خدمتونو وړاندې کولو او په اروپا کې د طالبانو د دیپلوماټیک حضور د پراخېدو په اړه خبرې شوي دي. دوی خبرداری ورکړی چې دا بهیر کولای شي له طالبانو سره د اړیکو د عادي کېدو لامل شي. هغوی همداراز ټینګار کړی چې اروپا باید د طالبانو د مخالفانو د تعقیب یا پر هغوی د فشار راوړلو لپاره په یوه وسیله بدله نه شي.
په مقاله کې راغلي چې که څه هم دا اړیکې د «تخنیکي خبرو اترو» په نوم ترسره کېږي، خو په عمل کې کولای شي له طالبانو سره د سیاسي اړیکو د عادي کولو زمینه برابره کړي. لیکوالان باور لري چې لوی سیاسي بدلونونه ډېری وخت له کوچنیو او تدریجي امتیازونو پیلېږي، او د داسې بهیر تکرار هغه څه چې مخکې د منلو وړ نه وو، ورو ورو عادي ښيي.
احمد مسعود او اورلین پرادیه هم لیکلي چې د دوی غوښتنه دا نه ده چې اروپا دې په افغانستان کې پوځي مداخله وکړي، بلکې دوی غواړي چې اروپايي اتحادیه د طالبانو ته د مشروعیت ورکولو له بهیر څخه ډډه وکړي. د دوی په باور، د ازادۍ، کثرتپالنې او د ملتونو د خپل برخلیک د ټاکلو حق ملاتړ باید د اروپا د سیاستونو په لومړیتوبونو کې وي.
لیکواله:سلیمه آریایي
