د غور د تیورې ولسوالۍ کې د طالبانو د یوه خپلوان له خوا پر یوې نجلۍ د جنسي تېري ادعا؛ ځايي سرچینې د شکایت کوونکو د ګواښلو خبر ورکوي
د غور ولایت د تیورې ولسوالۍ ځايي سرچینې ادعا کوي چې د دې ولسوالۍ د ولسوال یوه نږدې خپلوان پر یوې ځوانې نجلۍ د جنسي تېري په تور تورن شوی دی.
یوې باخبره سرچینې، چې نه یې غوښتل نوم یې افشا شي، توس نیوز ته ویلي چې تورن کس د تیورې د ولسوال وراره دی او د پېښې له رامنځته کېدو وروسته له دې موضوع څخه انځورونه او ویډیوګانې هم ثبت شوي دي. د سرچینې په وینا، د دغو محتواوو یوه برخه د سیمې د خلکو ترمنځ خپره شوې وه، خو د ځايي چارواکو له خبرداریو وروسته ډېرو کسانو هغه حذف کړي دي.
یادې سرچینې همداراز ادعا کړې چې د نجلۍ کورنۍ د احتمالي پایلو او امنیتي ګواښونو له وېرې نه شي کولای قضیه په ازاد ډول تعقیب کړي. د سرچینې په خبره، د قرباني کورنۍ یو ځل هڅه کړې وه چې خپل شکایت ثبت کړي، خو وروسته له خبرداریو او ګواښونو سره مخ شوي دي.
د دې قضیې اړوند لومړني شواهد او معلومات د یوه داسې کس له لوري، چې نه یې غوښتل نوم یې څرګند شي، توس نیوز ته سپارل شوي دي. خو توس نیوز تر اوسه نه دی توانېدلی چې د دغو ټولو ادعاوو خپلواکه کرهوالی تایید کړي.
په همدې حال کې، د سیمې یو شمېر اوسېدونکي ادعا کوي چې پخوا هم، هغه مهال چې د تیورې اوسنی ولسوال د دولینې ولسوالۍ مسؤول و، یو بل کس د ورته جرم په تور نیول شوی او سزا ورکړل شوې وه. دوی ادعا کوي چې طالبان اوس د دې موضوع په اړه دوهګونی چلند کوي.
توس نیوز وایي چې د دې قضیې په اړه د لا زیاتو معلوماتو او د نظر اخیستلو لپاره به هڅه وکړي د غور ولایت له ځايي چارواکو او د تیورې ولسوالۍ له مسؤولینو سره اړیکه ونیسي او د هغوی دریځ هم خپور کړي.
که د مسؤولو چارواکو ځواب ترلاسه شي، دا خبر به تازه او بشپړ شي.
لیکواله:سلیمه آریایي
