د جرمني پولیسو خبر ورکړی چې د بایرن ایالت د هرشینګ ښار د کډوالو په یوه کمپ کې یو ۴۰ کلن افغان د بل افغان له لوري د چاقو په برید کې وژل شوی دی.
د جرمني رسنیو د راپورونو له مخې، پېښه هغه مهال رامنځته شوه چې دوه افغان کډوال د کډوالو د استوګنې په مرکز کې له یو بل سره په شخړه واوښتل. د پولیسو د لومړنیو معلوماتو پر بنسټ، ۳۶ کلن افغان د شخړې پر مهال چاقو راایستلی او پر مقابل لوري یې څو وارې برید کړی دی.
عیني شاهدان وایي، قرباني د سر او ځیګر په برخه کې سخت ټپي شوی و. که څه هم بیړنیو مرستندویه کارکوونکو او ډاکټرانو د هغه د ژغورلو هڅه وکړه، خو نوموړي وروسته په روغتون کې ساه ورکړه.
پولیسو ویلي چې شکمن کس له کوم مقاومت پرته د خپل استوګنځي له کانټینر څخه نیول شوی دی. د چارواکو په وینا، محکمې د هغه د موقت توقیف او زندان ته د لېږدولو حکم صادر کړی دی.
د جرمي پولیسو او څارنوالۍ ادارو د پېښې د انګېزې او نورو اړخونو د روښانه کولو لپاره پراخې څېړنې پیل کړي دي.
لیکوال:سعید سمیر
