د پاکستان له وروستیو هوايي بریدونو وروسته، هند یوازینی هېواد دی چې په رسمي ډول یې دغه بریدونه غندلي او د افغانستان د ځمکنۍ بشپړتیا پر درناوي یې ټینګار کړی، په داسې حال کې چې تر اوسه د نړۍ بل هېڅ هېواد د دغو بریدونو په اړه رسمي غبرګون نه دی ښودلی.
د راپورونو له مخې، د پاکستان هوايي بریدونو په افغانستان کې پراخ ځاني او مالي زیانونه اړولي، خو نړیوالې ټولنې او د سیمې ډېری هېوادونو د دغو بریدونو په تړاو چوپتیا غوره کړې ده.
په همدې حال کې، د افغانستان پخواني ولسمشر محمد اشرف غني ویلي، افغانستان یوازې د پاکستان د بریدونو قرباني نه دی، بلکې د انزوا، د نړیوال مشروعیت د نشتوالي او د ملي اجماع د کمښت قرباني هم دی.
د سیاسي چارو یو شمېر شنونکي باور لري چې د نړیوالې ټولنې چوپتیا ښيي، د طالبانو اداره په ډیپلوماټیک ډګر کې له سختې انزوا سره مخ ده او همدې وضعیت د افغانستان پر وړاندې د نړیوالو غبرګونونه محدود کړي دي.
بلخوا، په اسلاماباد کې د ترکیې سفارت د پاکستان د کراچۍ ښار پر رنجر مرکزونو شوي بریدونه غندلي، خو پر افغانستان د پاکستان وروستي هوايي بریدونه یې نه دي غندلي.
په همدې لړ کې، د طالبانو ویاند ذبیحالله مجاهد ویلي، د پاکستان وروستي هوايي بریدونه به بې ځوابه پاتې نه شي. د هغه په وینا، افغانستان د جګړې پیلوونکی نه دی، خو که جګړه پرې وتپل شي، د خپلې خاورې او خلکو دفاع به وکړي.
د مجاهد د معلوماتو له مخې، په دغو بریدونو کې ۳۶ کسان وژل شوي او ۱۵۸ نور ټپیان شوي دي.
لیکوال:سعید سمیر
