په سمنګان ولایت کې ځایي سرچینې وایي چې تېر ماښام د دې ولایت د خُلم ولسوالۍ په یوه بازار کې د سرو زرو پر یوه دوکان د ناپېژنده وسلهوالو لهخوا وسلهوال برید شوی دی.
د سرچینو په وینا، دوه وسلهوال کسان چې د طالبانو د یونیفورم په څېر جامې یې اغوستې وې، بازار ته داخل شوي او د دوکان خاوند له ګواښلو وروسته یې د پام وړ اندازه سره زر له ځان سره وړي دي.
د پېښې شاهدان وایي چې بریدګر په چټکۍ سره سیمې ته داخل شول او په بازار کې یې وېره او ګډوډي رامنځته کړه. د هغوی په خبره، دغو کسانو له خلکو سره له مستقیمې نښتې پرته، د غلا تر ترسره کولو وروسته سیمه پرېښوده.
ځايي سرچینې زیاتوي چې د غلا شویو سرو زرو اندازه شاوخوا دوه کیلوګرامه اټکل شوې، خو تر اوسه یې کره شمېر په رسمي ډول نه دی تایید شوی.
د سیمې اوسېدونکو او یو شمېر دوکاندارانو د ورته پېښو د زیاتېدو په اړه اندېښنه ښودلې او په ګڼه ګونو بازارونو کې یې د جدي امنیتي تدابیرو غوښتنه کړې ده.
هغوی همداراز وایي چې د بریدګرو لهخوا د طالبانو د امنیتي ځواکونو په څېر د جامو کارول د خلکو ترمنځ د وېرې او اندېښنې د زیاتېدو لامل شوي دي.
لیکواله:سلیمه آریایي
