سرچینې وایي چې تېره شپه شاوخوا ۶۰۰ تنه د طالبانو سرتېري د افغانستان له جنوبي ولایتونو څخه په ملکي جامو کې د بدخشان ولایت د دې ډلې یوې پوځي قرارګاه ته داخل شوي دي.
د سرچینو په وینا، دغه ځواکونه به په بدخشان کې د طالبانو د یو شمېر ځايي جنګیالیو ځای ونیسي؛ هغه کسان چې د سرچینو په ادعا، په وروستیو اوونیو کې بې وسلې شوي یا له دندو ګوښه کړل شوي دي.
سرچینې همداراز ادعا کوي چې دا بدلونونه په بدخشان کې د امنیتي جوړښتونو د بدلونونو د لړۍ په دوام کې ترسره کېږي او موخه یې دا ده چې په دغه ولایت کې د طالبانو نور ځايي ځواکونه هم بې وسلې او له دندو لرې کړل شي.
دا بدلونونه په داسې حال کې راپور کېږي چې په تېرو اوونیو کې د بدخشان په بېلابېلو برخو کې د تاوتریخوالي د زیاتېدو، د ځواکونو د ځای پر ځای کېدو او د طالبانو د امنیتي اقداماتو د پراخېدو په اړه هم راپورونه خپاره شوي دي. ځايي سرچینو همداراز په ځینو سیمو کې د نورو ځواکونو د لېږلو او د امنیتي تدابیرو د پیاوړتیا خبر ورکړی دی.
د دې راپور تر خپرېدو پورې، د طالبانو چارواکو د دغو ادعاوو په اړه کوم غبرګون نه دی ښودلی.
لیکواله:سلیمه آریایي
