د افغانستان د پخواني جمهوري نظام د بهرنیو چارو وزیر محمد حنیف اتمر، د محرم میاشتې او عاشورا د ورځې په مناسبت ویلي چې د افغانستان د ثبات او پرمختګ لپاره ملي یووالی، ګډ کار او د خبرو اترو فرهنګ بنسټیز اهمیت لري.
اتمر په ایکس کې خپور کړي پیغام کې ویلي، د عاشورا تاریخي پېښه د اسلام په تاریخ کې د ایمان، تقوا، عدالتغوښتنې، صبر او استقامت تلپاتې ارزښتونه انځوروي او مسلمانانو ته د مسؤلیتپذیرۍ او یووالي درس ورکوي.
هغه د حضرت امام حسین او د هغه د یارانو قربانۍ د عزت، ازادۍ، ایثار او انساني او اسلامي ارزښتونو ته د وفادارۍ بېلګه بللې او ټینګار یې کړی چې د عاشورا پیغام د حق، عدالت او انساني کرامت د ساتنې الهامبښونکی دی.
د پخواني بهرنیو چارو وزیر په وینا، د هېواد د ټولو وګړو ګډون، د انساني حقونو او کرامت درناوی او د سولې او ملي تفاهم لپاره ګډې هڅې د افغانستان د راتلونکي لپاره حیاتي ارزښت لري.
اتمر زیاته کړې چې د افغانستان باثباته راتلونکی د ملي همغږۍ او ګډو همکاریو پورې تړلی دی او د عاشورا پیغام مسلمانان دې ته رابولي چې د تاوتریخوالي پر ځای د خبرو اترو، عدالت او متقابل تفاهم لاره خپله کړي.
هغه په پای کې هیله څرګنده کړې چې افغانستان د یووالي، سولې او سولهییز ګډ ژوند په مټ د تلپاتې ثبات او روښانه راتلونکي پر لور حرکت وکړي.
لیکوال:سعید سمیر
