ځايي سرچينې د کابل په ښار کې د طالبانو د کار او ټولنيزو چارو وزارت د اوسني سلاکار او د پخوانيو روزنتونونو د رئيس مولوي اصغر صفدري پر موټر د وسله وال بريد د ترسره کېدو خبر ورکړی. تر اوسه دغه راپور د مسوولو چارواکو له خوا په رسمي ډول نه تاييد شوی او نه هم رد شوی دی.
د يوه عيني شاهد د معلوماتو له مخې، چې له رسنيو سره يې خبرې کړي دي، دغه پېښه تېره ورځ د مازديګر شاوخوا ۵:۳۳ بجې رامنځته شوې ده. دغه سرچينه ادعا کوي چې مولوي صفدري په دې بريد کې سخت ټپي شوی او له پېښې وروسته په بېړني ډول يو روغتيايي مرکز ته لېږدول شوی دی.
تر دې دمه د بريد د څرنګوالي، د بريدګرو د هويت او د مولوي اصغر صفدري د اوسني روغتيايي حالت په اړه نور جزئيات نه دي خپاره شوي. همداراز، د طالبانو چارواکو تر اوسه د دې پېښې په اړه رسمي څرګندونې نه دي کړي.
مولوي اصغر صفدري د طالبانو له پېژندل شويو څېرو څخه دی او د بغلان ولايت د دهصلاح ولسوالۍ اوسېدونکی دی. نوموړي تر دې وړاندې د روزنتونونو عمومي رياست پر غاړه درلود او اوس د طالبانو د کار او ټولنيزو چارو وزارت کې د سلاکار په توګه دنده ترسره کوي.
توس نيوز د دې خبر د تعقيب په حال کې دی او که نوي معلومات ترلاسه شي، نور جزئيات به خپاره کړي.
لیکوال:سلیمه آریایي
