یو ځوان د تخار ولایت د فرخار ولسوالۍ په اوبو کې د ډوبېدو له امله خپل ژوند له لاسه ورکړی دی. سیمهییزې سرچینې وايي چې د دغه ځوان مړی له څو ساعته لټون وروسته له اوبو څخه راویستل شو او خپلې کورنۍ ته وسپارل شو.
د سرچینو په وینا، دا پېښه د جمعې په ورځ، د غبرګولي ۲۹مه، د فرخار په سیند کې رامنځته شوې ده. د قرباني هویت تر اوسه په رسمي ډول نه دی اعلان شوی، خو سیمهییزې سرچینې تاییدوي چې هغه د ډوبېدو له امله مړ شوی دی.
د پېښې شاهدان وايي چې د دغه ځوان د مړي د موندلو لپاره څو ساعته د لټون عملیات روان وو او په پای کې یو سپینږیری کس وتوانېد چې د هغه جسد له اوبو څخه وباسي.
دا پېښه په داسې حال کې رامنځته شوې چې د ګرمۍ د موسم په رارسېدو سره د هېواد په بېلابېلو سیمو کې ډېر خلک د تفرېح او لامبو لپاره سیندونو، رودونو او بندونو ته ورځي. خو د لامبو لپاره د خوندي او معیاري ځایونو نشتوالی، د خبرداري نښو کمښت او د ژغورنې د امکاناتو او د ژغورنې د ټیمونو نشتوالی هر کال د اوبو د مرګونو پېښو لامل کېږي.
په تېره اوونۍ کې هم د هېواد په بېلابېلو ولایتونو کې د ډوبېدو څو پېښې راپور شوي دي. د خپرو شویو معلوماتو له مخې، دوه کسان په غزني کې، یو کس په پروان او درې کسان په پنجشېر ولایت کې د ډوبېدو له امله خپل ژوند له لاسه ورکړی دی.
ښاریانو او مدني فعالانو څو ځله له مسوولو ادارو غوښتنه کړې چې د لامبو لپاره خوندي ځایونه جوړ کړي، د ژغورنې ځواکونه ځای پر ځای کړي او د عامه پوهاوي پروګرامونه پلي کړي، څو د داسې پېښو مخنیوی وشي.
لیکواله:سلیمه آریایي
