کریستیانو رونالډو، د پرتګال د ملي لوبډلې کپټان او د نړۍ ۴۱ کلن نامتو فوټبال ستوري، په خپلو تازه څرګندونو کې دا احتمال مطرح کړی چې ښايي د راتلونکي فصل په پای کې خپل مسلکي فوټبال پای ته ورسوي. رونالډو له «ووګ» مجلې سره په یوه مرکه کې ویلي چې راتلونکی کال به ښايي په فوټبال کې د هغه وروستی کال وي.
رونالډو ویلي چې غواړي خپله لوبیزه دوره په داسې ډول پای ته ورسوي چې په فوټبال کې ترې یو تلپاتې میراث پاتې شي. هغه چې په ۲۰۰۲ کال کې یې مسلکي فوټبال پیل کړی، اوس له دوو لسیزو ډېر وخت د نړۍ په لوړه کچه له فوټبال سره پاتې شوی او د خپل مسلک پای ته نږدې شوی دی.
دغه پرتګالي بریدګر د خپل مسلک په اوږدو کې د منچسټر یونایټډ، ریال مادرید، یوونټوس او النصر په څېر لوبډلو لپاره لوبېدلی او د فوټبال د تاریخ له تر ټولو بریالیو لوبغاړو څخه شمېرل کېږي. هغه د ډېرو کلونو لپاره د نړۍ د فوټبال له مهمو څېرو څخه هم پاتې شوی دی.
رونالډو تر اوسه ۵ د سرو زرو توپونه ګټلي او د خپل مسلکي مسلک په ترڅ کې یې د کلبونو او د پرتګال د ملي لوبډلې لپاره ټولټال ۹۷۶ ګولونه وهلي دي. هغه اوس د ۱۰۰۰ ګولونو تاریخي ریکارډ ته د رسېدو په درشل کې دی؛ داسې یو ریکارډ چې ښايي د هغه د مسلک له وروستیو سترو هدفونو څخه وي.
رونالډو د خپلو خبرو په یوه بله برخه کې له فوټبال وروسته خپل ژوند ته هم اشاره کړې او ویلي یې دي چې د فوټبال د تشې د ډکولو لپاره غواړي ډېر وخت په سفر، تفریح او پډل ټینس لوبولو تېر کړي. هغه زیاته کړې چې له ۲۵ کلونو مسلکي فعالیت او ډېرو قربانیو وروسته، غواړي د خپل فوټبالي مسلک له لاسته راوړنو خوند واخلي.
رونالډو به د پرتګال له خوا د ۲۰۲۶ نړیوال جام له ناکامۍ او د نړیوالې اتلولۍ له نه ګټلو وروسته هم له النصر سره خپل حضور ته دوام ورکړي او د سعودي عربستان د مسلکي لیګ په نوي فصل کې به سیالۍ کوي. هغه به هڅه وکړي چې د خپل مسلک تر پای ته رسېدو مخکې د ۱۰۰۰ ګولونو تاریخي شمېر ته ځان ورسوي.
لیکواله:سلیمه آریایي
