ملا حسن اخوند، د طالبانو رئیسالوزرا، په یوه حکم کې مولوي احسانالله حسان د باختر دولتي خبري اژانس د نوي رئیس په توګه ټاکلی دی. ښاغلي حسان د یکشنبې په ورځ، د چنګاښ په ۷مه، په رسمي ډول خپله دنده په دې خبري اژانس کې پیل کړه.
له دې مخکې هدایتالله هدایت د باختر خبري اژانس ریاست پر غاړه درلود. تر اوسه د طالبانو له لوري د دې بدلون د دلیل په اړه کوم وضاحت نه دی ورکړل شوی.
مولوي احسانالله حسان تر دې مخکې د طالبانو د اطلاعاتو او فرهنګ وزارت د دفتر د رئیس په توګه دنده ترسره کوله. هغه اوس د نوي حکم له مخې د باختر دولتي خبري اژانس د مدیریت مسؤلیت پر غاړه اخستی دی.
طالبانو د بیا واکمنېدو وروسته پر رسنیو پراخ محدودیتونه لګولي او معلوماتو ته لاسرسی یې هم محدود کړی دی. دا اقدامات د رسنیو د ازادۍ د ملاتړو بنسټونو له غبرګون سره مخ شوي دي.
طالبانو د باختر خبري اژانس د نوي رئیس د معرفي مراسمو هېڅ انځور نه دی خپور کړی او یوازې یې د هغه د دفتر د مېزونو او څوکيو انځورونه رسنیو ته ورکړي دي.
د طالبانو د امر بالمعروف او نهی عن المنکر د قانون له مخې، د ژوندي موجوداتو د انځورونو خپرول منع دي. دا محدودیت د دولتي رسنیو د خبرونو او انځورونو پر خپرولو هم اغېز کړی دی.
طالبانو د بیا واکمنېدو وروسته د ۱۴۰۰ کال د زمري میاشتې راهیسې د دولتي ادارو ګڼ شمېر مسلکي کارکوونکي له دندو ګوښه کړي او د دې ډلې پورې تړلي کسان، چې یو شمېر یې ملايان هم دي، په بېلابېلو دولتي پوستونو کې ګمارلي دي.
لیکواله:سلیمه آریایي
