د ملګرو ملتونو له خوا د هغو راپورونو له خپرېدو وروسته چې د طالبانو په زندانونو کې د ښځو پر وړاندې د جنسي ځورونې او جنسي تېريو ادعاوې پکې شوې دي، د افغانستان د ملي امنیت پخواني رئیس، رحمتالله نبیل، پر طالبانو سختې نیوکې کړي او د دغو تورونو په اړه یې د خپلواکو، شفافو او بېطرفه څېړنو غوښتنه کړې ده.
نبیل په خپلو څرګندونو کې ټینګار کړی چې که دا راپورونه رښتیا ثابت شي، نو موضوع به یوازې یوه عادي پېښه یا انفرادي سرغړونه نه وي، بلکې داسې تورونه دي چې د افغانستان د اوسنیو واکمنانو اخلاقي، دیني او انساني مشروعیت به په جدي ډول تر پوښتنې لاندې راولي.
هغه پوښتنه کړې چې ولې طالبان د حقیقت موندنې د خپلواکو پلاوو له ورتګ څخه زندانونو او توقیفخونو ته هرکلی نه کوي، او ولې دا مرکزونه د نړیوالو ادارو پر مخ تړلي پاتې دي.
د افغانستان د ملي امنیت پخواني رئیس همداراز ویلي چې په زندانونو کې د هر ډول احتمالي پېښو مسؤلیت د طالبانو د رهبرۍ پر غاړه دی، ځکه هغه حکومت چې د واک او پرېکړو ټولې سرچینې په خپل لاس کې لري، نه شي کولای د دغو تورونو په وړاندې ځان بېمسؤلیته وښيي.
نبیل د خپلو خبرو په بله برخه کې د ځینو دیني عالمانو پر چوپتیا هم نیوکه کړې او ویلي یې دي چې د انسان کرامت، د ښځو عزت او د مظلومانو ملاتړ د اسلام بنسټیز ارزښتونه دي، او د داسې تورونو په وړاندې چوپ پاتې کېدل د منلو وړ نه دي.
طالبانو تر اوسه پورې د خپلو زندانونو او توقیفخونو په اړه د بشري حقونو د سرغړونو اړوند تورونه رد کړي دي؛ خو نړیوالو بشري حقونو سازمانونو او د ملګرو ملتونو ادارو څو ځله غوښتي چې د توقیف مرکزونو ته خپلواک او بېخنډه لاسرسی ورکړل شي.
لیکواله:سلیمه حکیمي
