د طالبانو د لوړو زده کړو وزیر ندا محمد ندیم د ترکیې له سفیر سادین ایلیډیز څخه غوښتي چې د افغانستان پوهنتونونو ته د تدریس لپاره ترکي استادان او د طبي زده کړو د عملي روزنې لپاره متخصص ډاکټران واستوي.
د طالبانو د لوړو زده کړو وزارت ویلي، ندا محمد ندیم د ترکیې له سفیر سره په لیدنه کې غوښتنه کړې چې د کابل طبي علومو پوهنتون اړوند د علياباد تدریسي روغتون دوه پخوانۍ ودانۍ بېرته ورغول شي او د تدریسي روغتونونو د تجهیز په برخه کې هم همکاري وشي.
د دغه وزارت په وینا، د ترکیې سفیر سادین ایلیډیز د علمي همکاریو د پراختیا لپاره د خپل هېواد چمتووالی څرګند کړی او ویلي یې دي چې ترکي پوهنتونونه کولی شي له افغان پوهنتونونو سره علمي اړیکې او هوکړهلیکونه ولري.
دا غوښتنه داسې مهال کېږي چې د طالبانو له بیا واکمنېدو وروسته یو شمېر افغان استادان د اقتصادي ستونزو، محدودو کاري فرصتونو او امنیتي اندېښنو له امله له هېواده وتلي، او د لوړو زده کړو په برخه کې د مسلکي کدرونو کمښت د اندېښنې وړ موضوع بلل کېږي.
د طالبانو د لوړو زده کړو وزارت تر دې مخکې هم له بېلابېلو هېوادونو غوښتي چې د افغانستان پوهنتونونو ته استادان او متخصصین واستوي، څو د تدریس او عملي روزنې په برخو کې همکاري وکړي.
لیکوال:سعید سمیر
