د افغانستان د ملي مقاومت جبهې اعلان کړی چې د دې جبهې ځواکونو د طالبانو پر ضد خپلو بریدونو په دوام کې د هرات ولایت په ګذرې ولسوالۍ کې د دې ډلې دوه غړي هدف ګرځولي او وژلي دي. د دې جبهې په وینا، دغه عملیات د ملکي وګړو له کوم زیان پرته ترسره شوي دي.
د خبرپاڼې له مخې چې د شنبې په ورځ، د چنګاښ شپږمه نېټه خپره شوې، دغه برید د جمعې ماښام شاوخوا ۹:۳۰ بجې د هرات ـ کندهار د کمربندي لارې په درې لارې سیمه کې، چې د ګذرې ولسوالۍ پورې اړه لري، ترسره شوی دی.
په خبرپاڼه کې راغلي چې هدف ګرځول شوي کسان د طالبانو د الفاروق قول اردو د لومړۍ لواء د کشف کنډک غړي وو او هغه مهال چې په دې سیمه کې په ګزمه بوخت وو، د برید ښکار شول. د ملي مقاومت جبهې همدارنګه ادعا کړې چې د دې جبهې ځواکونه له عملیاتو وروسته له کومې مرګ ژوبلې پرته له سیمې وتلي دي.
د ملي مقاومت جبهې ټینګار کړی چې د دې برید پر مهال هېڅ ملکي وګړي ته زیان نه دی اوښتی.
طالبانو تر اوسه د دې ادعا په اړه کوم غبرګون نه دی ښودلی. دغه ډله تل د ملي مقاومت جبهې او نورو وسله والو مخالفو ډلو پوځي شتون او فعالیت ردوي او عموماً د دغو ډلو له خوا د اعلان شویو بریدونو مسوولیت نه مني.
خو د ملګرو ملتونو دوراني راپورونه ښيي چې په وروستیو میاشتو کې د ملي مقاومت جبهې او د افغانستان د ازادۍ جبهې یو شمېر بریدونه د طالبانو پر پوستو ثبت شوي دي؛ هغه څه چې د افغانستان په ځینو ولایتونو کې د دوامدارو ناامنیو او د طالبانو پر ضد د مخالفو ډلو د محدودو فعالیتونو ښکارندویي کوي.
لیکواله:سلیمه آریایي
