«سان» راپور ورکړی چې د نایجریا د کاتسینا یونایټډ فوټبال لوبډلې لوبغاړی چیندو اوزور، څو ساعته وروسته له هغې چې په رسمي ډول یې د مړینې خبر ورکړل شو، په سړه خونه کې بېرته په هوش راغی او اوس د خپل ژوند د ژغورلو لپاره تر درملنې لاندې دی.
اوزور د کاتسینا یونایټډ او نیجر ټورناډوز ترمنځ د نایجریا په یوه دوستانه، د نوي فصل له پیل مخکې لوبه کې ناڅاپه پر ځمکه ولوېد. دې پېښې د دواړو لوبډلو د مینهوالو او غړو ترمنځ جدي اندېښنه رامنځته کړه.
ډاکټرانو له معاینې وروسته د دې مدافع لوبغاړي د مړینې اعلان وکړ. خو څو ساعته وروسته، د سړې خونې کارکوونکو ولیدل چې اوزور خپل لاس خوځولی دی؛ دې ناڅاپي پېښې د هغه وضعیت په بشپړه توګه بدل کړ.
اوزور سمدستي د کاتسینا عمومي روغتون د جدي پاملرنې څانګې ته ولېږدول شو او اوس د اکسیجن تر درملنې لاندې دی. ډاکټران هڅه کوي چې د هغه روغتیايي وضعیت بېرته ثابت کړي.
دا پېښه په داسې حال کې رامنځته شوه چې کاتسینا یونایټډ کلب تر دې مخکې په ټولنیزو رسنیو کې د دغه لوبغاړي د مړینې خبر خپور کړی و او رسمي تعزیت یې هم وړاندې کړی و.
د کلب په لومړني بیان کې راغلي وو چې له ډېرې خواشینۍ سره د نیجر ټورناډوز پر وړاندې په لوبه کې د یوې طبي بیړنۍ پېښې له رامنځته کېدو وروسته د خپل نوي لوبغاړي د مړینې خبر ورکوي او له کورنۍ او خپلوانو سره یې خپله خواخوږي څرګندوي.
د لومړني خبر له خپرېدو وروسته، د نایجریا پریمیر لیګ او د دغه هېواد یو شمېر نورو کلبونو هم د خواخوږۍ او تسلیت پیغامونه خپاره کړل.
اوزور د روانې میلادي میاشتې په لومړیو کې له کاتسینا یونایټډ سره یوځای شوی و او د نوي فوټبال فصل د پیل لپاره یې چمتووالی نیوه.
لیکواله:سلیمه آریایي
