د پاکستان د بهرنیو چارو وزارت د افغانستان لپاره بریټانيا ځانګړي استازي ریچارډ لېنډسي وروستۍ څرګندونې رد کړي او هغه یې «یو اړخیزې» بللي دي. دغه وزارت وايي، د نوموړي څرګندونې د سیمې د حساسو مسایلو، په ځانګړي ډول د ډیورنډ کرښې د شخړې، د ژور درک پرته مطرح شوي دي.
د وزارت په وینا، د داسې څرګندونو وړاندې کول چې د سیمې له تاریخي او سیاسي واقعیتونو سره سمون ونه لري، د ستونزو د حل پر ځای د لا زیاتې پېچلتیا لامل ګرځي. اسلام اباد ټینګار کړی چې د افغانستان او پاکستان ترمنځ موجودې لانجې باید د متقابل درناوي او رغنده خبرو اترو له لارې حل شي.
د پاکستان چارواکو همداراز ویلي، نړیوال استازي باید د سیمې د حساسو موضوعاتو په اړه له احتیاطه کار واخلي او له یو اړخیز دریځه ډډه وکړي، څو د دواړو هېوادونو ترمنځ د باور فضا زیانمنه نه شي.
لیکوال:سعید سمیر
