د تخار ولایت یو شمېر اوسېدونکي وایي چې په ښارونو او بازارونو کې د طالبانو د «امر بالمعروف او نهې عن المنکر» محتسبانو حضور او فعالیت زیات شوی دی؛ داسې وضعیت چې د دوی په وینا د ښځو او نجونو لپاره د لا زیاتو محدودیتونو اندېښنې زیاتې کړي او عامه فضا یې له وېرې او احتیاطه ډکه کړې ده.
یو شمېر ښاریانو د شنبې په ورځ، د غبرګولي ۳۰مه، له رسنیو سره په خبرو کې ویلي چې د طالبانو د امر بالمعروف مامورین د ښار په بېلابېلو سیمو، په ځانګړي ډول په بازارونو او ګڼې ګوڼې لرونکو څلورلارو کې د ښځو د جامو او تګ راتګ پراخ څار کوي. د دوی په وینا، په ځینو مواردو کې د ښځو د درولو،له هغوی څخه د پوښتنو او لنډمهاله نیولو راپورونه هم ورکړل شوي دي.
د اوسېدونکو په خبره، د دې څارنو زیاتوالي له امله ډېرې ښځې د خپلو ورځنیو چارو لپاره له کوره د وتلو پر مهال له اندېښنې او احتیاطه کار اخلي او په عامه ځایونو کې د هغوی حضور کم شوی دی.
د تالقان ښار، د تخار ولایت مرکز، یو شمېر ښځې وایي چې دا محدودیتونه د دوی پر ورځني ژوند اغېز کړی او عامه فضا یې د وېرې او ځان سانسور پر چاپېریال بدله کړې ده.
عارفه احمدي، چې د امنیتي دلایلو له امله یې مستعار نوم کارولی، وایي حتی لنډ بازار ته تګ هم د طالبانو د محتسبانو د چلند له وېرې سره مل وي. هغه زیاتوي: «یو ځل له خپل ۱۰ کلن ورور سره د کار لپاره تالقان ښار ته ولاړم. د طالبانو د امر بالمعروف مامورینو د ماسک کارولو او د برقعې نه درلودو له امله ودرولم. د امر بالمعروف ادارې ته له لېږد وروسته شاوخوا څلور ساعته بندي وم او وروسته د پلار په ضمانت خوشې شوم. له هغه وروسته مې بیا ښار ته د تګ جرأت نه دی کړی.»
په ورته وخت کې، د تخار ولایت یو شمېر مدني فعالان خبرداری ورکوي چې د دې بهیر دوام کولی شي د ښځو ټولنیز او اقتصادي ګډون نور هم کم کړي او د هغوی د لا زیاتې انزوا زمینه برابره کړي.
په همدې حال کې، په تخار ولایت کې د طالبانو سیمهییزو چارواکو تر اوسه د دې راپورونو په اړه کوم غبرګون نه دی ښودلی. د دې وضعیت په دوام سره اندېښنې زیاتې شوي چې د ښځو د ژوند او ټولنیز حضور فضا لا پسې محدوده شي.
لیکواله:سلیمه آریایي
