سمېع سادات، د افغانستان د پوځ د ځانګړو ځواکونو پخواني قوماندان، په پاکستان کې پر ځینو سیمو د طالبانو د بېپیلوټه الوتکو بریدونه غندلي او دا یې د دواړو خواوو ترمنځ د تاوتریخوالي د زیاتېدو لامل بللي دي.
ښاغلي سادات د جمعې په ورځ په خپلې اېکس پاڼه کې لیکلي چې دغه بریدونه کولای شي د پاکستان د پراخ پوځي غبرګون خطر زیات کړي او افغانستان ته د پام وړ امنیتي پایلې ولري.
هغه ټینګار کړی چې طالبان نه د دې توان لري او نه هم اړینه اراده، څو د دغو اقداماتو د احتمالي پایلو پر وړاندې د افغانستان ملکي وګړي خوندي کړي، او هر ډول د شخړې زیاتوالی کولای شي د عادي خلکو ژوند له ګواښ سره مخ کړي.
دا څرګندونې داسې مهال کېږي چې د طالبانو د دفاع وزارت د جمعې په ورځ اعلان وکړ چې د دې ډلې ځواکونو تېره شپه د هوايي بریدونو له لارې د پاکستان د بلوچستان او خیبر پښتونخوا ایالتونو کې د داعش اړوند مرکزونه په نښه کړي دي.
د طالبانو د دفاع وزارت په خبرپاڼه کې راغلي چې افغانستان به هېڅکله اجازه ورنه کړي چې د هېواد د امنیت او ثبات پر ضد کوم ګواښ رامنځته شي، او د داسې ګواښونو د مخنیوي لپاره به له ټولو شته امکاناتو څخه کار واخلي.
خو سمېع سادات باور لري چې دا ډول دریځونه کولای شي د کابل او اسلامآباد ترمنځ د لا زیاتو ترینګلتیاوو زمینه برابره کړي او د پاکستان د متقابل پوځي اقدام احتمال زیات کړي.
هغه همدارنګه ادعا کړې چې په تېرو کلونو کې د تحریک طالبان پاکستان او القاعده په څېر ډلو څخه د طالبانو ملاتړ، په افغانستان کې د لا ډېرې بېثباتۍ لامل شوی او د میلیونونو افغانانو پر امنیت یې اغېز کړی دی.
د افغانستان د پوځ د ځانګړو ځواکونو پخواني قوماندان له پاکستانه غوښتي چې له زغم او احتیاط څخه کار واخلي او د ملکي وګړو د مرګژوبلې د مخنیوي لپاره ټول اړین اقدامات په پام کې ونیسي.
سمېع سادات زیاته کړې چې د افغانستان خلک باید د طالبانو د خطرناکو او غیرمسؤلانه پرېکړو او اقداماتو بیه ورنه کړي، او د ملکي وګړو د ژوند خوندیتوب باید د ټولو خواوو لومړیتوب وي.
بل لور ته، پاکستان د طالبانو هغه ادعا رد کړې چې ګواکې د پاکستان په خاوره کې یې ډروني بریدونه ترسره کړي دي. د پاکستان د اطلاعاتو او خپرونو وزارت د حقیقتموندنې څانګې ویلي چې د داعش په ګډون د یو شمېر وسلهوالو ډلو مرکزونه د افغانستان په هغو سیمو کې فعالیت کوي چې د طالبانو تر کنټرول لاندې دي، او له هماغو سیمو څخه اداره کېږي.
تر اوسه د طالبانو چارواکو د پاکستان د نوي غبرګون او د سمېع سادات د څرګندونو په اړه رسمي ځواب نه دی ورکړی.
لیکواله:سلیمه آریایي
