د سي آی اې پخوانۍ مامورې سارا اډمز ویلي، چې د افغانستان په ننګرهار ولایت کې د داعش خراسان څانګې د مالي کمېسیون د جوړښت او فعالیتونو په اړه تر اوسه د طالبانو د وروستیو عملیاتو کوم څرګند او محسوس اغېز نه دی لیدل شوی.
هغې زیاته کړې، چې د دغې ډلې مالي شبکه لا هم په ځانګړي ډول د ننګرهار په اچین ولسوالۍ کې فعاله پاتې ده او د راپورونو له مخې خپلې مالي چارې په منظم ډول مخته وړي.
سارا اډمز ټینګار کړی، چې که څه هم طالبان وخت په وخت د داعش پر ضد عملیات ترسره کوي، خو د دغې شبکې د مالي او تشکیلاتي جوړښتونو په له منځه وړلو کې تر اوسه واضح پرمختګ نه دی لیدل شوی.
د هغې په وینا، د داعش خراسان څانګه لا هم هڅه کوي چې په سیمه کې خپل مالي سرچینې وساتي او د خپلو فعالیتونو د دوام لپاره یې کاروي.
تر اوسه طالبانو د دغو څرګندونو په اړه رسمي غبرګون نه دی ښودلی.
لیکوال:سعید سمیر
