د افغانستان د بشري حقونو د خپلواک کمیسیون پخوانۍ مشرې، شهرزاد اکبر، ویلي چې لرغونی هرات د هغو کسانو تر واک لاندې دی چې د دین او خلکو د یرغمل کولو تصور لري. نوموړې پر طالبانو نیوکه کړې او ویلي یې دي چې د ظلم او زورواکۍ دا پړاو به پای ته ورسېږي او د دوی کړنې به بې حسابه پاتې نه شي.
شهرزاد اکبر په خپل اېکس پاڼه کې د هرات د ښځو د وروستیو اعتراضونو په غبرګون کې لیکلي: «د هرات زړورو ښځو! تاسې په دې تیاره زمانه کې د هیلې څراغ بل ساتلی او د مقاومت او عزت بېلګه ګرځېدلې یاست.»
بل لور ته، د بشري حقونو د «رواداري» بنسټ په خپل تازه راپور کې په هرات کې د ښځو او اوسېدونکو پر وړاندې د محدودیتونو، د طالبانو د سختو تګلارو او د امر بالمعروف وزارت د چلندونو د پراخېدو په اړه اندېښنه ښودلې ده.
د راپور له مخې، هر کال زرګونه افغانان د طالبانو له لوري په خپلسري ډول نیول کېږي، ځورول کېږي او وهل ټکول کېږي. رواداري ویلي چې یوازې په ۲۰۲۵ کال کې یې لږ تر لږه د ۲۱۲۵ خپلسرو نیونو پېښې مستندې کړې دي.
دغه بنسټ زیاتوي چې په ۲۰۲۵ کال کې د بشري حقونو د سرغړونو کچه د تېر کال په پرتله لوړه شوې او هدفي او غیرقانوني وژنې، خپلسرې نیونې، جبري ورکېدنې، شکنجې او سپکاوي ډوله چلندونه د پام وړ زیات شوي دي.
لیکوال:سعید سمیر
