د کورنیو چارو وزیر سراجالدین حقاني په منځګړیتوب د خوست د سپېرې ولسوالۍ د بوريخېلو او د پکتیکا د ګیان ولسوالۍ د ګیانخېلو قومونو ترمنځ له یوې پېړۍ زیاته اوږده دښمني د پای ته رسېدو هوکړه شوې ده.
د راپورونو له مخې، د دغې شخړې په اوږدو کلونو کې د دواړو لورو ترمنځ په نښتو کې له ۲۰۰ ډېر کسان وژل شوي او ګڼ نور ټپیان شوي دي.
ویل کېږي، د اختلافاتو د دوام پر مهال دواړو خواوو یو د بل پر وړاندې په لارو کې ماینونه ځای پر ځای کړي او په ځینو مواردو کې یې له درنو وسلو هم کار اخیستی دی.
د کورنیو چارو وزارت د معلوماتو له مخې، د سیمې له ارزونې او د دواړو لورو له موافقې وروسته د شخړې د هواري وروستۍ پرېکړه شوې او د هوکړې د عملي کولو او څارنې لپاره ځانګړې کمېټه هم ټاکل شوې ده.
لیکوال:سعید سمیر
