لیکواله:سلیمه آریایي
رسنۍ وایي چې تېره شپه طالبانو د افغانستان له خاورې څخه د پاکستان د چمن او باجور سیمو باندې د هاوان ډزې کړي دي. د دې بریدونو په نتیجه کې لږ تر لږه یو کس وژل شوی او یو بل ټپي شوی دی.
د سرچینو په وینا، یو هاوان مرمۍ د چمن په محمد حسن کلي کې یوه کور باندې لګېدلې چې له امله یې دوه ورونه وژل شوي او یو ټپي شوی دی.
همداراز، د راپورونو له مخې، په دې برید کې ځینې هټۍ هم زیانمنې شوې دي. تر اوسه پورې د طالبانو او پاکستان د رسمي مقاماتو له خوا په دې پېښه هیڅ تبصره نه ده شوې.
دا بریدونه په داسې حال کې شوي چې د یکشنبې له ورځې وروسته، چې یوه نسبي ارامتیا وه، د طالبانو او پاکستان ترمنځ جګړې بیا زیاتې شوي دي.
د دوشنبې په ورځ، ځینو سیمهییزو سرچینو افغانستان انټرنیشنل ته ویلي چې پاکستاني پوځ د کونړ ولایت د اسدآباد مرکز او د سید جمالالدین افغاني پوهنتون باندې د توپخانې بریدونه کړي دي.
د کونړ دولتي روغتون سرچینو هم ویلي چې د پاکستاني بریدونو په نتیجه کې د اسدآباد او سرکانو ولسوالۍ کې د ۷ کسانو د وژنې او ۷۵ کسانو د ټپي کېدو راپور ورکړی دی. دغو ټپيانو کې ښځې او ماشومان هم شامل دي.
سیمهییزو سرچینو همداراز ویلي چې پاکستاني پوځیان د قندهار ولایت په سپین بولدک ولسوالۍ کې څو کلي د هاوان له لاري تر برید لاندې راوستي او وروسته یې طالبانو د پاکستاني پوستو په لور ډزې کړي دي.
پاکستان تل د طالبانو پر وړاندې د تحریک طالبان پاکستان ملاتړ کولو تور لګولی دی، خو طالبانو دا ادعا رد کړې ده.
