سرچینې وايي، په بدخشان کې د نسي ولسوالۍ د نښتو له زیاتېدو وروسته طالبانو د دې ولسوالۍ ټول روغتیايي مرکزونه تر خپل کنټرول لاندې راوستي دي. د سرچینو په وینا، یو شمېر ناروغان د ولسوالۍ له کلینیک څخه ایستل شوي او د طالبانو اړوند ډاکترانو د دې ډلې د ټپیانو د درملنې مسوولیت پر غاړه اخیستی دی.
د طالبانو د ځواکونو او د دې ډلې د یوه قوماندان جمعهخان فاتح د کسانو ترمنځ نښتې سېشنبې، د زمري په ۲۰مه، ماښام پیل شوي او تر اوسه دوام لري. ځايي سرچینې وايي، په وروستیو ساعتونو کې نښتې لاپسې سختې شوې او د طالبانو په لیکو کې د ټپیانو شمېر هم زیات شوی دی.
د سرچینو په وینا، طالبانو د خپلو ټپیانو د درملنې لپاره په نسي ولسوالۍ کې موجود روغتیايي مرکزونه تر خپل کنټرول لاندې راوستي دي. سرچینې زیاتوي چې د ولسوالۍ له کلینیک څخه د ناروغانو په ایستلو سره، د دغه مرکز روغتیايي امکانات د طالبانو د ټپیانو د درملنې لپاره ځانګړي شوي دي.
یوه ځايي سرچینه وايي، د طالبانو د استخباراتو یوه قطعه، له پنځو امبولانسونو او یوې مجهزې روغتیايي ډلې سره، په نسي ولسوالۍ کې حضور لري. د یادې سرچینې په وینا، دغه روغتیايي ډله د طالبانو ټپیان د نښتې له سیمې څخه روغتیايي مرکزونو ته لېږدوي او د هغوی د درملنې بهیر څاري.
په همدې حال کې، د فیضاباد ښار د بدخشان روغتون سرچینې وايي، دغه روغتون د احتمالي طالب ټپیانو د منلو لپاره په تیارسۍ کې ساتل شوی دی. سرچینو نه دي ویلي چې تر اوسه له نسي ولسوالۍ څخه څومره ټپیان فیضاباد ته لېږدول شوي دي.
له بلې خوا، سرچینې وايي، د طالبانو یوې چورلکې څو شېبې مخکې په فیضاباد کې ناسته کړې ده. د سرچینو په وینا، ښايي له دې چورلکې څخه د نسي ولسوالۍ د نښتو د ټپیانو د لېږد لپاره کار اخیستل شوی وي.
سرچینې همداراز وايي، دغې چورلکې د چهارشنبې په ورځ درې ځله د فیضاباد او د نښتې د سیمې ترمنځ تګ راتګ کړی دی. خو د ټپیانو د شمېر، د نښتې د مرګژوبلې او د دغې چورلکې د تګ راتګ د دقیق مقصد په اړه خپلواک معلومات نه دي ترلاسه شوي.
دا راپور د ځايي او باخبره سرچینو پر معلوماتو ولاړ دی او د مرګژوبلې او ټپیانو د شمېر، او همداراز د طالبانو د ځواکونو او د جمعهخان فاتح د کسانو ترمنځ د نښتې د اصلي علت په اړه جزئیات تر اوسه په خپلواک ډول نه دي تایید شوي.
لیکواله:سلیمه آریایي
