خالد ځدران، په کابل کې د طالبانو د پولیسو ویاند، د سوریې د ولسمشر احمد الشرع د یوې ټولنیزې رسنۍ پوسټ لاندې د هغه ستاینه وکړه. هغه احمد الشرع ته په خطاب کې ولیکل: «موږ ډاډه یو چې سوریه به ستاسو تر مشرۍ لاندې د سولې، ثبات او یووالي نوې مرحلې ته داخله شي، او دا کال به د سوریې د خلکو لپاره د خیر، پرمختګ او هوساینې پیل وي.»
احمد الشرع دغه پیغام د ایکس (پخوانی ټویټر) په ټولنیزه شبکه کې د خپل پوسټ په غبرګون کې ترلاسه کړ. د سوریې ولسمشر د نوي هجري قمري کال د پیل په مناسبت خلکو ته مبارکي ورکړې وه او هغوی ته یې د امنیت، ثبات او هوساینې هیله څرګنده کړې وه.
د احمد الشرع په ملاتړ د خالد ځدران پیغام په ټولنیزو رسنیو کې د کاروونکو پام ځانته اړولی او بېلابېل غبرګونونه یې راپارولي دي.
طالبانو له هغه وخته چې بېرته په افغانستان کې واک ته رسېدلي، د سوریې تحولاتو ته په دقت کتلي او د دې هېواد د بېلابېلو پېښو په اړه یې دریځونه څرګند کړي دي.
احمد الشرع له واک ته رسېدو وروسته هڅه کړې چې د سوریې دیپلوماټيکې اړیکې پراخې کړي. هغه د خپلې واکمنۍ له پیل څخه یوازې دوه میاشتې وروسته سعودي عربستان ته سفر وکړ، او په یوه کال کې یې ترکیې، قطر، متحده عربي اماراتو، کویټ، مصر، فرانسې، اذربایجان، اردن او د امریکا متحده ایالاتو ته هم سفرونه کړي دي.
په دغو سفرونو کې د احمد الشرع منظم او آراسته ظاهري بڼه، د جامو ځانګړی سبک، او په نړیوالو غونډو کې رسمي ویناوو د رسنیو پام ځانته اړولی او د سوریې د رهبرۍ نوې څېره یې وړاندې کړې ده.
تر دې وړاندې، محمد جلال چې د طالبانو د کورنیو چارو وزیر ته نږدې شخصیت بلل کېږي، د احمد الشرع د ژوند لاره عراق کې د زندان له دورې څخه تر دې چې د سوریې د ولسمشرۍ مقام ته ورسېد، «فوقالعاده» بللې وه.
لیکواله:سلیمه آریایي
