طالبانو د پولیسو په نوي قانون کې په افغانستان کې د هر ډول لاریون ترسره کول منع کړي دي. دا قانون چې د طالبانو د مشر هبتالله اخوندزاده له خوا تدوین شوی، د شنبې په ورځ، د زمري په ۳۱مه، د دې ډلې د عدلیې وزارت له خوا د «شرطې قانون» تر عنوان لاندې خپور شو.
په دغه قانون کې طالبانو د پولیسو نوم «شرطې» ته بدل کړی دی. د «شرطې قانون» په ۵۰مه ماده کې په څرګنده توګه راغلي دي: «د افغانستان په قلمرو کې هر ډول لاریون منع ده.» په دې ماده کې د دې بندیز د څرنګوالي یا د عملي کېدو د شرایطو په اړه نور وضاحت نه دی ورکړل شوی.
د دغه قانون خپرېدل په داسې حال کې دي چې طالبانو په تېرو پنځو کلونو کې په افغانستان کې له بېلابېلو لاریونونو سره چلند کړی دی. دې ډلې په ګڼو مواردو کې لاریون کوونکي نیولي او د اعتراضي غونډو جوړول یې محدود کړي دي.
د «شرطې» په نوي قانون کې د لاریونونو د ترسره کولو د منعې رسمي ثبت په داسې حال کې شوی چې طالبانو افغانستان کې بېرته واک ته له رسېدو راهیسې د اعتراضي فعالیتونو او عامه غونډو پر وړاندې پراخ محدودیتونه لګولي دي.
لیکواله:سلیمه آریایي
