د طالبانو مخالفې ډلې «متحدې جبهې» ادعا کړې چې ځواکونو یې تېره شپه د غور ولایت په الفاروق ولسوالۍ کې د طالبانو پر یوې قرارګاه برید کړی دی.
د دغې جبهې په وینا، په دې عملیاتو کې د طالبانو لږ تر لږه دوه غړي وژل شوي او څلور نور ټپیان شوي دي.
متحدې جبهې ادعا کړې چې د نښتې پر مهال د طالبانو قرارګاه په بشپړه توګه سقوط شوې او د طالبانو یو شمېر وسلې او پوځي تجهیزات یې هم نیولي دي.
دې ډلې په اېکس کې د دغو عملیاتو یوه ویډیو هم خپره کړې چې پکې ادعا شوې نیول شوې وسلې او مخابره ښودل کېږي.
طالبانو تر اوسه د دې برید او د متحدې جبهې د ادعاوو په اړه څه نه دي ویلي.
په دې وروستیو کې د طالبانو دوو مخالفو وسلهوالو ډلو، متحدې او ازادۍ جبهې، په افغانستان کې د خپلو بریدونو د زیاتېدو ادعاوې کړي دي.
لیکوال:سعید سمیر
