سرچینو رسنیو ته ویلي چې د طالبانو او پاکستان د استازو ترمنځ غیررسمي مذاکرات په استانبول ښار کې پای ته رسیدلي دي. د دې سرچینو په وینا، خبرې اترې په لنډه او صریح توګه ترسره شوي او اصلي محور یې ګډ امنیتي مسائل وو.
په دې مذاکراتو کې د پاکستان د تحریک طالبان او د داعش ډلې فعالیتونه باندې بحث شوي دي. سرچینې وایي چې دواړه خواوې په ځینو مسلو کې لومړنۍ هوکړې ته رسېدلي دي، که څه هم د دې هوکړو جزییات لا تر اوسه نه دي خپاره شوي.
د خپرو شویو معلوماتو پربنسټ، د مذاکراتو خواوو غوښتنه کړې چې طالبان، تحریک طالبان پاکستان یو تروریستي ګروپ وبولي او په مقابل کې پاکستان باید د داعش ډله په خپله خاوره کې په رسمي ډول ومني. دا مسایل د دواړو خواوو ترمنځ د اصلي اختلافاتو څخه بلل شوي دي.
راپورونه ښيي چې د طالبانو او پاکستان حکومت ترمنځ د نږدې استازو لخوا د توافق یو وړاندیز شوی متن بشپړ شوی دی، خو دغه متن لا تر اوسه رسنیو ته نه دی ورکړل شوی او دقیقه محتوا یې نه ده معلومه. همدارنګه، دا هم روښانه نه ده چې آیا طالبان دغه هوکړه په نهايي توګه ومني که نه.
له دې مخکې هم د طالبانو او پاکستان حکومت ترمنځ څو ځله خبرې اترې په بېلابېلو هېوادونو کې لکه دوحه، ریاض، استانبول او اورومچې کې ترسره شوې وې چې کومه څرګنده پایله یې نه وه ورکړې. سرچینې وایي چې وروستۍ ناسته د ترکیې په ملاتړ او د دواړو خواوو د غیر رسمي تایید سره ترسره شوې ده.
لیکواله:سلیمه آریایي
