په نورستان کې سرچینې وایي چې د دې ولایت د مرکز یو اوسېدونکی د یوه ګرځندوی د ډزو له امله وژل شوی دی.
د سرچینو په وینا، دا پېښه (شنبې، د غبرګولي ۹مه) د نورستان ولایت د مرکز پارون اړوند د اشټوی په سیمه کې رامنځته شوې ده.
سرچینو د پېښې د څرنګوالي په اړه نور جزئیات نه دي ورکړي، خو ویلي یې دي چې وژل شوی کس د خپل کور مخې ته د چمن په اوبه کولو بوخت و، چې د یوه ګرځندوی له لوري د ډزو هدف وګرځېد.
په ورته وخت کې، یوې بلې سرچینې ویلي چې ګرځندوی هوایي ډزې کولې، خو مرمۍ د نورستان پر یوه ځايي اوسېدونکي ولګېده او هغه یې وواژه.
تر اوسه په نورستان کې د طالبانو ځايي امنیتي چارواکو د دې پېښې په اړه څه نه دي ویلي.
لیکواله:سلیمه آریایي
