د متحده ایالاتو ولسمشر ډونالډ ټرمپ د پنټاګون د توغندیو د زېرمو د کمېدو په اړه راپورونه رد کړي او ویلي یې دي چې امریکا د مهماتو «ستره کچه» لري. هغه همداراز ټینګار کړی چې په دغه هېواد کې د وسلو د تولید بهیر په چټکۍ سره د پراخېدو په حال کې دی.
ټرمپ د پنجشنبې په ورځ، د زمري ۱۵مه، په خپل ټولنیز رسنیز پلیټفارم «ټروث سوشیل» کې لیکلي چې متحده ایالات، په ځانګړې توګه د ځینو مهماتو په برخه کې، پراخې زېرمې لري. د هغه په وینا، په ورته وخت کې په هېواد کې د وسلو لوی مقدار تولیدېږي او د اړتیا په صورت کې به وسله والو ځواکونو ته وسپارل شي.
د امریکا ولسمشر همداراز ادعا کړې چې د دغه هېواد دفاعي صنعتي شرکتونه د متحده ایالاتو په تاریخ کې د وسلو د تولید تر ټولو ډېرې فابریکې جوړوي؛ هغه اقدام چې د ده په وینا د امریکا د پوځي تولید ظرفیت به لوړ کړي.
ټرمپ وروسته د امریکا د توغندیو د زېرمو د کمېدو په اړه د رسنیو راپورونو ته غبرګون وښود او خبرداری یې ورکړی هغه کسان چې محرم معلومات یې رسنیو ته ورکړي، له قانوني لارو به تعقیب شي.
هغه په ټروث سوشیل کې لیکلي: «د دغو خیانتکارو معلوماتو افشا کوونکي کسان د پېژندلو او تعقیب لاندې دي او د هغوی لپاره به دې اوږدې مودې بند سزا غوښتنه وشي.»
تر دې وړاندې واشنګټن پوسټ راپور ورکړی و چې ډونالډ ټرمپ په ډېوېډ کمپ کې په یوه غونډه کې د امریکا د دفاع له وزیر پېټ هېګسېت څخه د دغه هېواد د توغندیو د زېرمو د کمېدو په اړه وضاحت غوښتی و او پوښتنه یې کړې وه چې ولې د اوږد واټن هدایت کېدونکو توغندیو او د هوايي دفاع د مخنیوي توغندیو د کمښت په اړه ناسم معلومات ورکړل شوي دي.
واشنګټن پوسټ همداراز راپور ورکړی و چې د امریکا د توغندیو د زېرمو کمښت د ایران پر وړاندې د پراخو بریدونو د نه ترسره کولو په اړه د ټرمپ په پرېکړه کې رول درلود. دغه راپور تر اوسه د امریکايي چارواکو له خوا په رسمي ډول نه دی تأیید شوی، او ټرمپ هم د توغندیو د زېرمو د کمېدو ادعاوې رد کړي دي.
لیکواله:سلیمه آریایي
