په بدخشان کې ځايي سرچینو د طالبانو د ولایت مقام ته څېرمه پر یوه پوسته د راکټي برید خبر ورکړی دی. دا پوسته د بدخشان ولایت په مرکز، فیضاباد ښار کې موقعیت لري. د سرچینو په وینا، دغه پېښه د سې شنبې په ماښام، د زمري په ۲۰مه، رامنځته شوې ده.
سرچینې وایي، ناپېژاندو بریدګرو پر دې پوسته دوه راکټونه توغولي دي. د راکټونو له چاودنې وروسته د طالبانو د ځواکونو او بریدګرو ترمنځ وسله واله نښته پیل شوې ده. تر اوسه د بریدګرو هویت او د برید انګېزه نه ده معلومه.
تر اوسه د دغه برید د احتمالي ځاني تلفاتو او مالي زیانونو په اړه کره معلومات نه دي خپاره شوي. د طالبانو ځايي چارواکو هم تر دې دمه د پېښې په اړه رسمي څرګندونې نه دي کړي او د تلفاتو یا زیانونو د کچې په اړه یې معلومات نه دي وړاندې کړي.
دا برید په داسې حال کې شوی چې بدخشان ولایت په وروستیو میاشتو کې د ورته څو امنیتي پېښو شاهد پاتې شوی دی. خو تر دې دمه رسمي سرچینو د برید د څرنګوالي، احتمالي تلفاتو او رامنځته شویو زیانونو په اړه نور جزیات نه دي خپاره کړي.
لیکواله:سلیمه آریایي
