د ملګرو ملتونو د مرستندوی دفتر (یوناما) په خپل تازه راپور کې ویلي چې په افغانستان کې د پخوانیو حکومتي چارواکو او امنیتي ځواکونو پر وړاندې د وژنو، خپلسرو نیونو او شکنجو پېښې لا هم دوام لري.
د زمري په ۶مه خپور شوي راپور کې راغلي چې د ۲۰۲۶ میلادي کال د اپرېل له لومړۍ نېټې څخه د جون تر ۳۰مې پورې، د پخوانیو پوځیانو د وژلو لږ تر لږه ۸ قضیې مستندې شوي دي.
راپور زیاتوي چې په همدې موده کې د پخوانیو عسکرو د خپلسري نیولو ۲۹ او د شکنجې ۵ پېښې هم ثبت شوي دي.
یوناما خبرداری ورکړی چې له ګاونډیو هېوادونو څخه په زوره ایستل شوي پخواني افغان سرتېري له جدي امنیتي ګواښونو سره مخ دي. د راپور له مخې، په هرات ولایت کې له ایران څخه یو اخراج شوی پخوانی عسکر تر راستنېدو وروسته لادرکه شوی دی.
لیکوال:سلیمه آریایي
