افغان دیني عالمانو د طالبانو پر وړاندې د پوځي عملیاتو د پیل غوښتنه کړې.
د افغانستان متحدې جبهې اعلان کړی چې د افغانستان له بېلابېلو سیمو څخه لږ تر لږه ۱۸۰ دیني عالمانو په یوه فتوا کې له دې جبهې غوښتنه کړې چې د طالبانو پر وړاندې پوځي عملیات ترسره کړي. د دې جبهې په وینا، دغه فتوا په کابل کې د دیني عالمانو او د دیني علومو د څېړونکو په یوه غونډه کې صادره شوې ده.
د افغانستان متحدې جبهې د پنجشنبې په ورځ، د وږي په پنځمه، په یوه اعلامیه کې ویلي چې دغه فتوا د یو شمېر دیني عالمانو، اسلامي پوهانو او د تفسیر، اصول دین، حدیث، فقه، سیرت، عقیدې او نورو دیني علومو د څېړونکو له خوا صادره شوې ده.
د اعلامیې له مخې، فتوا د دیني عالمانو له یوه مرکز څخه صادره شوې؛ هغه مرکز چې په ۱۳۹۴ کال کې د اسلامي دین او شریعت د روښانه تفسیر د وړاندې کولو او له خرافاتو، دیني بدعتونو، بېلارۍ او مذهبي اختلافاتو سره د مبارزې په موخه جوړ شوی و.
د افغانستان متحدې جبهې ویلي چې دیني عالمانو په یوه جلا لیک کې، چې دې جبهې ته یې استولی، د افغانستان اوسنی وضعیت «د طاغوت له خوا اشغال شوی» بللی او د خلکو له دغه حالت څخه خلاصول یې «دیني رسالت» ګڼلی دی.
په دې لیک کې له افغانستان متحدې جبهې غوښتل شوي چې وسلهوالې مبارزې ته مخه کړي او د هغه څه لپاره اقدام وکړي چې دغو عالمانو د «طاغوت له شر څخه د خلکو ازادول» بللي دي. متحدې جبهې ویلي چې دغه فتوا د افغانستان د ټولو سیمو د دیني عالمانو په استازیتوب صادره شوې ده.
د افغانستان متحدې جبهې اعلان کړی چې د دغو عالمانو غوښتنې ته یې مثبت ځواب ورکړی او د طالبانو پر وړاندې د پوځي مبارزې د دوام پر خپل تعهد یې ټینګار کړی دی. دې جبهې د طالبانو پر وړاندې پوځي عملیات «دیني فریضه» بللې او ویلي یې دي چې د طالبانو د حکومت تر نسکورېدو پورې به خپلې مبارزې ته دوام ورکړي.
سمېع سادات، د افغانستان متحدې جبهې مشر او د افغانستان د پخواني پوځ جنرال، د زمري میاشتې په لومړیو کې اعلان کړی و چې دې جبهې د طالبانو پر وړاندې پوځي عملیات پیل کړي دي. دې جبهې په وروستیو اوونیو کې هم د افغانستان په څو ولایتونو کې د طالبانو پر وړاندې د ګڼو بریدونو د ترسره کولو ادعا کړې ده.
خو په دې راپور کې د دغې فتوا د صادرېدو، د ګډون کوونکو عالمانو د شمېر او د افغانستان متحدې جبهې له خوا د اعلان شویو پوځي بریدونو په اړه ادعاوې په خپلواکه توګه نه دي تایید شوي.
لیکواله:سلیمه آریایي
