د ډنمارک د نوي حکومت له جوړېدو سره، د خپرو شویو راپورونو له مخې، افغانتبارې ډنمارکۍ سیاستوالې سمیرا نوا امیني د دغه هېواد کابینې ته د اقلیم، انرژۍ او عامه خدمتونو د وزیرې په توګه لار موندلې ده. نوموړې په ډنمارک کې یوه پېژندل شوې سیاسي څېره ده او تر دې وړاندې یې هم د اقلیمي او انرژۍ پالیسۍ په برخو کې فعالیت کړی دی.
د راپورونو له مخې، سمیرا نوا د سوسیال لیبرال تمایل لرونکي ګوند «رادیکال ونستره» غړې ده او د چهارشنبې له ورځې به د یاد وزارت مسؤلیت پر غاړه واخلي. خو تر اوسه دغه ګومارنه د ټولو معتبرو سرچینو له لوري په خپلواکه او رسمي توګه نه ده تایید شوې.
په راپورونو کې راغلي چې د اقلیمي بدلونونو او د انرژۍ د تأمین موضوعات د ډنمارک د نوي حکومت له مهمو لومړیتوبونو څخه دي او د کابینې جوړښت هم د همدې موضوعاتو پر بنسټ ترتیب شوی دی.
سمیرا نوا په ۱۹۸۸ کال کې د ډنمارک د آلبورګ ښار کې د افغانتباره والدینو په کورنۍ کې زېږېدلې ده. د هغې مور او پلار په ۱۹۸۶ کال کې د شوروي جګړې له امله له افغانستانه ډنمارک ته کډه شوي وو.
هغې په کوپنهاګن پوهنتون کې د اقتصاد په برخه کې لوړې زده کړې کړي دي او سیاست ته تر داخلېدو وړاندې یې د ډنمارک په بېلابېلو دولتي ادارو او څېړنیزو مرکزونو کې دندې ترسره کړې دي.
سمیرا نوا په ۲۰۱۹ کال کې د «رادیکال ونستره» ګوند د استازې په توګه د ډنمارک پارلمان ته بریالۍ شوه او وروسته یې د اقتصاد، کارموندنې، جنسیتي برابرۍ او اقلیمي پالیسۍ په برخو کې سیاسي فعالیتونو ته دوام ورکړ.
هغې په ورپسې ټاکنو کې هم بیا پارلمان ته لار وموندله او د خپل ګوند په سیاسي جوړښت کې د یوې فعالې او اغېزناکې څېرې په توګه راڅرګنده شوه.
لیکواله:سلیمه آریایي
