د طالبانو ویاند ذبیحالله مجاهد د «زوجینو د تفریق اصولنامې» په اړه راپورته شویو نیوکو ته په غبرګون کې ویلي، چې دغه اصولنامه د کمعمره نجونو د ودولو د جواز معنا نه لري، بلکې د محاکمو او قضاتو لپاره د پېچلو کورنیو قضیو د حل په موخه جوړه شوې ده.
مجاهد ویلي، دا اصولنامه د اسلامي شریعت او حنفي فقهې پر بنسټ د علماوو له لوري ترتیب شوې، څو قاضیان وکولای شي د نکاح، مېراث، د ماشوم زیږون او د نابالغو د واده اړوند پخوانیو قضیو کې واضح او چټکې پرېکړې وکړي.
د نوموړي په وینا، په حنفي فقهه کې پلار او نیکه د ولایت حق لري، خو دا صلاحیت ځانګړي شرطونه لري او باید د نجلۍ پر وړاندې ظلم، اعتیاد او یا خصمانه چلند موجود نه وي.
د طالبانو ویاند ټینګار کړی چې د هبتالله اخوندزاده له فرمان سره سم، د نجلۍ له رضایت پرته نکاح منع ده او د واده لپاره د نجلۍ اجازه لازمي ګڼل کېږي. هغه ویلي، د همدې اصل له مخې نجلۍ باید د تصمیم نیولو عمر او وړتیا ولري.
مجاهد همداراز ادعا کړې چې د طالبانو محاکمو په تېر کال کې د جبري ودونو، کمعمره ودونو او په بدو کې د نجونو د ورکولو ګڼې قضیې درولې دي.
لیکوال:سعید سمیر
