ذکیه محقق، د محمد محقق لور او د افغانستان د سیاسي مشرانو د ډلې غړې، وایي چې د طالبانو د واکمنۍ له پیل څخه نږدې پنځه کاله وروسته په افغانستان کې د ښځو د حقونو وضعیت په دوامداره توګه خراب شوی دی. هغې له اسلامي هېوادونو وغوښتل چې د چوپتیا پر ځای د افغانستان د ښځو د ملاتړ لپاره عملي لارې چارې او مشخص اقدامات وړاندې کړي.
هغې له افغانستان انټرنشنل سره په خبرو کې وویل چې اسلامي هېوادونو تر اوسه د وضعیت د بدلون لپاره اغېزمن اقدام نه دی کړی او طالبانو هم د ښځو په اړه په خپلو پالیسیو کې هېڅ ډول شاتګ نه دی ښودلی. دا څرګندونې په داسې وخت کې کېږي چې په اسلاماباد کې د اسلامي همکاریو سازمان د ښځو غونډه روانه ده.
ذکیه محقق ټینګار کړی چې د طالبانو تګلارې د ښځو، لږکیو، قومونو او مذهبونو په اړه له اسلامي لارښوونو سره هېڅ تړاو نه لري، بلکې دا ډله د اسلام له نوم څخه ناوړه ګټه اخلي. هغې همداراز د افغانستان لپاره د یوه ولسواک حکومت د جوړېدو پر اړتیا ټینګار وکړ.
هغې د تېرو نږدې پنځو کلونو په ترڅ کې د افغان ښځو له اساسي حقونو د محرومېدو په اړه ویلي چې ښځې د اوسني وضعیت تر ټولو سترې قربانیاني دي. د هغې په وینا، دغو محدودیتونو پر ټولنه ژورې اغېزې کړي دي چې جبرانول به یې په راتلونکو کلونو کې هم اسانه نه وي.
د افغانستان د اسلامي وحدت د خلکو د ګوند د مشر لور زیاته کړه چې په اوسني وضعیت کې په افغانستان کې د ښځو د کرامت او حقونو د ساتنې لپاره کوم اغېزمن میکانیزم نشته. هغې خبرداری ورکړی چې د دې وضعیت دوام به ټولنه له لا پراخو او ژورو پایلو سره مخ کړي.
ذکیه محقق د اسلامي همکاریو سازمان د ښځو غونډې ته په اشارې وویل چې افغانې ښځې باید په داسې غونډو کې حضور ولري، څو خپلې غوښتنې او نظرونه په مستقیم ډول له اسلامي هېوادونو سره شریک کړي او د افغان ښځو او نجونو غږ نړیوالې ټولنې ته ورسوي.
هغې په پای کې وویل چې تر اوسه هېڅ هېواد د افغانستان د وضعیت په اړه د عملي اقدام لپاره مخکښ نه دی شوی. هغې د اسلامي هېوادونو، لوېدیځو هېوادونو او د بشري حقونو د ملاتړ کوونکو نورو دولتونو ترمنځ د پراخې اجماع د رامنځته کېدو غوښتنه وکړه، څو د افغانستان له خلکو ملاتړ وشي.
د اسلامي همکاریو سازمان چې ۵۷ اسلامي هېوادونه پکې غړیتوب لري، په خپلې وروستۍ غونډه کې د طالبانو له خوا د ښځو پر زده کړو او کار محدودیتونه د اسلامي ارزښتونو خلاف وبلل او خبرداری یې ورکړ چې د دې تګلارې دوام د نړۍ په کچه د اسلام انځور ته زیان رسولی شي.
لیکواله:سلیمه آریایي
