په کابل کې د ایران سفیر عليرضا بېکدلي وايي، هېواد یې د افغانستان په ټولو اقتصادي پروګرامونو کې فعاله ونډه لري.
بېکدلي دا څرګندونې د افغانستان د کرنې او مالدارۍ په لومړي نړیوال نندارتون کې د ګډون پر مهال کړې دي. نوموړي وویل، په دغه نندارتون کې د ایران ۵۰ شرکتونو ګډون کړی او بېلابېل کرنیز محصولات او توکي یې نندارې ته وړاندې کړي دي.
د طالبانو د کرنې، اوبو لګولو او مالدارۍ وزارت وايي، دغه پنځهورځنی نندارتون د سېشنبې په ورځ، د زمري په ۲۰مه، په کابل کې پرانیستل شو.
د یاد وزارت په وینا، د نندارتون موخه د افغان بزګرانو او مالدارانو د تولیداتو لپاره د بازار موندنې زمینه برابرول او د کرنې او مالدارۍ په برخو کې د فعالانو ترمنځ د تجربو، مسلکي نوښتونو او معلوماتو شریکول دي.
لیکوال:سعید سمیر
