د پاکستان پوځ: په هنګو عملیاتو کې یو قوماندان او اووه وسلهوال وژل شوي دي.
د پاکستان پوځ د شنبې په ورځ، د زمري ۱۷مه، اعلان وکړ چې د خیبر پښتونخوا ایالت د هنګو په سیمه کې د امنیتي ځواکونو د یوه عملیاتو په ترڅ کې د پوځ یو قوماندان او اووه وسلهوال وژل شوي دي. د پاکستان پوځ ویلي چې په دې عملیاتو کې یو شمېر وسلې او څه اندازه مهمات هم د وسلهوالو له ډلې څخه د امنیتي ځواکونو لاس ته ورغلي دي.
د پاکستان د پوځ د اعلامیې له مخې، وژل شوی قوماندان ۲۷ کلن حمزه اکرم و چې له وسلهوالو سره د نښتې پر مهال وژل شوی دی. د پاکستان پوځ وژل شوي وسلهوال «د هند له خوا ملاتړ شوي خوارج» بللي دي؛ دا هغه اصطلاح ده چې پاکستاني چارواکي یې د تحریک طالبان پاکستان لپاره کاروي.
په وروستیو اوونیو کې د پاکستان په بېلابېلو برخو کې د امنیتي ځواکونو او وسلهوالو ډلو ترمنځ نښتې زیاتې شوي دي. خیبر پښتونخوا او بلوچستان له هغو سیمو څخه دي چې د پوځي عملیاتو او د وسلهوالو د بریدونو د زیاتېدو شاهدان دي.
اسلاماباد په وروستیو کلونو کې څو ځله ادعا کړې چې د تحریک طالبان پاکستان غړي د پاکستان پر ضد د بریدونو د پلان او ترسره کولو لپاره د افغانستان له خاورې استفاده کوي. د افغانستان طالب چارواکو دا ادعا رد کړې او ویلي یې دي چې هېڅ هېواد پر ضد د برید لپاره به د افغانستان د خاورې د کارولو اجازه ورنه کړي.
د پاکستان او افغان طالبانو ترمنځ په وروستیو کلونو کې د افغانستان په خاوره کې د تحریک طالبان پاکستان د شتون او فعالیت په اړه د ادعاوو له امله کړکېچ دوام لري. اسلاماباد له کابل څخه د دې ډلې پر وړاندې د اقدام غوښتنه کړې، په داسې حال کې چې طالب چارواکو ټینګار کړی چې اجازه نه ورکوي د افغانستان له خاورې پر پاکستان یا نورو هېوادونو برید وشي.
لیکواله:سلیمه آریایي
