جاوېد نيازی، د «پيګرد» خبري اژانس امتياز لرونکی، د طالبانو له زندان څخه تر ۶۲ ورځني بند وروسته خوشې شو.
سرچينو تاييد کړې چې ښاغلی نيازی، چې د مې د مياشتې په ۵مه د طالبانو له خوا نيول شوی او زندان ته لېږدول شوی و، د ۶۲ ورځني بند له تېرولو او د قضايي بهير له بشپړېدو وروسته، نن خوشې شوی دی.
د هغه خوشې کېدل د کورنۍ، دوستانو، همکارانو او د بيان د ازادۍ د ملاتړو بنسټونو له اوونيو اندېښنو وروسته ترسره شول او د هغوی له هرکلي سره مخ شول.
د بند پر مهال د ښاغلي نيازي کورنۍ له ګڼو فشارونو او اندېښنو سره مخ وه. هم مهاله، د هغه وضعيت د رسنيو د فعالانو او د بشري حقونو د مدافعانو له خوا په پرلهپسې توګه څارل کېده.
د جاوېد نيازي خوشې کېدو يو ځل بيا په افغانستان کې د خبريالانو د نيولو او د رسنيو د ازادۍ موضوع د پام وړ ګرځولې ده.
د رسنيو فعالان ټينګار کوي چې د بيان د ازادۍ دوامداره ملاتړ او د خبريالانو د خونديتوب تأمين د ازادو رسنيو د فعاليت له اساسي شرطونو څخه دي. هغوی هيله څرګنده کړې چې د خبريالانو د نيولو ورته پېښې هم پای ته ورسېږي.
دا خبر په داسې حال کې خپرېږي چې د يو شمېر نورو بنديانو د وضعيت په اړه اندېښنې لا هم پر ځای دي، او د بشري حقونو بنسټونه د هغوی د وضعيت په اړه د لا زيات شفافيت غوښتنه کوي.
لیکواله:سلیمه آریایي
