د «افغانستان د ښځو د آزادۍ شبکې» د یوې غونډې په جوړولو او د بنسټیز پرېکړهلیک په خپرولو سره، خپل رسمي فعالیت پیل اعلان کړ. په دې غونډه کې د ښځو د حقونو یو شمېر فعالانو، د عدالت غوښتونکو او مدني فعالانو ګډون کړی و او د افغانستان د ښځو او نجونو د اساسي حقونو د دفاع پر اړتیا یې ټینګار وکړ.
د دې شبکې په بنسټیز پرېکړهلیک کې راغلي چې فعالیتونه یې د آزادۍ، عدالت، برابرۍ او انساني کرامت پر اصولو ولاړ دي. د شبکې غړي باور لري چې تلپاتې سوله، پرمختګ او ټولنیز عدالت یوازې هغه وخت رامنځته کېدای شي چې ښځې او نارینه د ژوند په ټولو برخو کې مساوي ګډون ولري، او د ټولنې د نیمایي برخې حذف کېدل د هرې ټولنې د پرمختګ پر وړاندې جدي خنډ دی.
د افغانستان د ښځو د آزادۍ شبکې خپله دنده د ښځو او نجونو د اساسي حقونو دفاع، د ټولنیز ګډون پراخول، د زدهکړو، کار او اقتصادي پیاوړتیا ملاتړ، او د مدني، حقوقي، رسنیزو او نړیوالو ظرفیتونو کارول د خپلو موخو د ترلاسه کولو لپاره اعلان کړې ده.
په دې پرېکړهلیک کې د نجونو له زدهکړو محرومول، د ښځو پر کار محدودیتونه او له ټولنیزو او سیاسي برخو څخه د هغوی لرې کول، د بشري حقونو ښکاره سرغړونه او د افغانستان د راتلونکي لپاره جدي ګواښ بلل شوی دی. شبکې خبرداری ورکړی چې د میلیونونو نجونو له زدهکړو محرومول هېواد له مسلکي او نوښتګرو بشري سرچینو بې برخې کوي، بېوزلي زیاتوي او د افراطیت او وروسته پاتې کېدو د پراختیا زمینه برابروي.
د دې اعلامیې له مخې، د افغانستان د ښځو د آزادۍ شبکه غواړي د بدیلو زدهکړیزو فرصتونو په رامنځته کولو، د انلاین زدهکړو پراختیا، د علمي، مسلکي او مهارتي پروګرامونو پلي کولو، د ښځو د کار او سوداګرۍ ملاتړ، د اقتصادي وړتیاوو پیاوړتیا او د زیانمنو ښځو لپاره د ملاتړ شبکو په جوړولو کې فعالیت وکړي.
شبکې همدارنګه اعلان کړی چې په افغانستان کې د ښځو د حقونو وضعیت به په دوامداره توګه ثبت او مستند کړي، د بشري حقونو د سرغړونو موارد به راټول کړي او اړوند راپورونه به د تعقیب لپاره نړیوالو اړوندو بنسټونو ته وړاندې کړي.
د پرېکړهلیک په بله برخه کې د افراطیت د پراختیا او د افغانستان د ښوونیز نظام د محدودېدو په اړه اندېښنه ښودل شوې ده. په اعلامیه کې ویل شوي چې د علمي زدهکړو پر ځای ایډیالوژیکي زدهکړې د هېواد راتلونکي، تلپاتې سولې او سیمهییز امنیت ته جدي ګواښ دی، او پر هغو پروګرامونو د ملاتړ ټینګار شوی چې د انتقادي فکر، سولهییز ګډ ژوند، برابرۍ، بشري حقونو ته درناوي او انساني پرمختګ پر بنسټ ولاړ وي.
د افغانستان د ښځو د آزادۍ شبکې ژمنه کړې چې د هغو ښځو ترڅنګ به ولاړه وي چې له تاوتریخوالي، تبعیض، محرومیت او ګواښونو سره مخ دي، او د حقوقي، رواني او ټولنیزو مشورو د خدمتونو د پراختیا او د ملاتړ لارو د رامنځته کولو لپاره به هڅې کوي.
په اعلامیه کې راغلي چې له بېلابېلو برخو څخه د ښځو منظم حذف کېدل، یوازې د هغوی د اساسي حقونو سرغړونه نه ده، بلکې د افغانستان د پرمختګ، ثبات او ودې بهیر هم له ستونزو سره مخ کوي. د شبکې د غړو په باور، هغه ټولنه چې ښځې یې د زدهکړې، کار او ټولنیز ګډون له حقونو محرومې وي، عدالت، هوساینې او تلپاتې پرمختګ ته نه شي رسېدلی.
د شبکې غړو په پای کې له ملګرو ملتونو، د بشري حقونو شورا، یوناما، د سیمې او نړۍ له حکومتونو، د بشري حقونو له مدافع سازمانونو او مدني بنسټونو وغوښتل چې د افغانستان د ښځو د حقونو د سرغړونو پر وړاندې چوپ پاتې نه شي، د ښځو پر وړاندې تبعیضي سیاستونه وغندي او د ښځو او نجونو د اساسي حقونو د تضمین لپاره له ټولو حقوقي او دیپلوماټيکو امکاناتو کار واخلي.
د افغانستان د ښځو د آزادۍ شبکې په پای کې ټینګار کړی چې د افغانستان راتلونکی یوازې د ټولو وګړو د برابر ګډون، پرته له جنسیتي، قومي، مذهبي او سیاسي تبعیض څخه، ممکن دی؛ او دا شبکه به د آزادۍ، برابرۍ، عدالت او د غوره راتلونکي لپاره خپلې مدني، سولهییزې او قانوني مبارزې ته دوام ورکړي.
لیکواله:سلیمه آریایي
