په هرات ولایت کې سیمه ییزې سرچینې وايي، د طالبانو د امر بالمعروف او نهې عن المنکر وزارت محتسبینو د سې شنبې په ماښام د هرات ښار په بکراباد کلي کې سلجوقي هفت سیمې ته په ننوتلو سره لږ تر لږه درې ښځې نیولي او له ځان سره یې وړي دي.
د سرچینو په وینا، دا ښځې سربېره پر دې چې هغه ډول جامې یې اغوستې وې چې طالبان یې «کامل حجاب» بولي، نیول شوي. یوه سرچینه دا هم وايي چې د دې وزارت محتسبینو پرون دوه نورې ښځې چې چادرۍ یې په سر وې، د هغه څه له امله تعقیب کړې وې چې «د لږ مقدار سینګار درلودل» عنوان شوي دي.
له هرات څخه د ترلاسه شویو معلوماتو له مخې، له ښځو سره د طالبانو چلند نوي پړاو ته داخل شوی دی. سیمه ییزې سرچینې وايي چې د دې نیونو ساحه نور یوازې په هغه څه محدوده نه ده چې طالبان یې «بدحجابي» بولي، بلکې هغه ښځې هم د محتسبینو له غبرګون سره مخ کېږي چې د سینګار ولري، لوړ پېزار اغوندي یا بېلابېل ډوله پوښښ لري.
طالبانو واک ته له بیا رسېدو وروسته په افغانستان کې د ښځو پر ژوند، زده کړو او کار پراخ محدودیتونه لګولي دي. دې ډلې د ۱۴۰۲ لمریز کال په اوړي کې په ټول هېواد کې د ښځینه سینګارځایونو فعالیت منع کړ او د هغوی د تړل کېدو امر یې ورکړ، خو راپورونه ښيي چې یو شمېر دا سینګارځایونه تر اوسه پورې په پټه خپل فعالیت ته دوام ورکوي او کله ناکله د محتسبینو له پېژندنې او چاپو سره مخ کېږي.
د ۱۴۰۲ لمریز کال له ژمي راهیسې تر اوسه هم د کابل، دایکنډي، بلخ او هرات په ګډون په بېلابېلو ښارونو کې د «بدحجابۍ» په تور د ښځو او نجونو د نیولو ګڼ راپورونه خپاره شوي دي. دغه نیونې د بشري حقونو د بنسټونو او ملګرو ملتونو له غبرګون او نیوکو سره مخ شوي دي.
لیکواله:سلیمه آریایي
