ځایي سرچینې په بدخشان ولایت کې وايي چې د طالبانو د ډلې د داخلي اختلافاتو د زیاتېدو په ترڅ کې، یو لوی پوځي کاروان د جمعهخان فاتح د نیولو لپاره د دې ډلې د بدخشان د پخواني والي د مرستیال د نیولو په هدف د شغنان ولسوالۍ ته استول شوی دی؛د سرچینو په وینا،دا اقدام،د طالبانو په جوړښت کې د داخلي ترینګلتیاوو د زیاتېدو ښکارندویي کوي.
د دغو سرچینو په وینا، دغه کاروان د یکشنبې په سهار، د غبرګولي ۳۱مه، شاوخوا ۵۰ عرادې پوځي او بار وړونکو موټرو سره، چې پکې هاموې وسایط هم شامل وو، د شغنان ولسوالۍ پر لور روان شوي دی. سرچینې وايي د دې عملیاتو اصلي هدف د جمعهخان فاتح نیول دي؛ هغه کس چې په وروستیو اونیو کې یې نوم د طالبانو د داخلي اختلافاتو، په ځانګړي ډول د بدخشان د سرو زرو د کانونو د مدیریت او کنټرول پر سر، مطرح شوی دی.
سرچینو همدارنګه ویلي چې د غور ولایت د طالبانو د والي مرستیال محبوب حامد څخه غوښتل شوي وو چې په دې عملیاتو کې ګډون وکړي، خو هغه له دې ماموریت سره له یو ځای کېدو انکار کړی دی. د همدې سرچینو په وینا، هغه د اختر له ورځې راهیسې تر اوسه پورې د خپلې دنده په ځای کې هم نه دی حاضر شوی، چې دې موضوع د طالبانو په داخلي جوړښت کې د اختلافاتو د پراخېدو اټکلونه زیات کړي دي.
په ورته وخت کې، باخبره سرچینې په بدخشان کې د طالبانو د بېلابېلو ډلو ترمنځ د ترینګلتیا د زیاتېدو خبر ورکوي او وايي چې د دې ډلې د ځواکونو ترمنځ د احتمالي نظامي نښتې خطر مخ په زیاتېدو دی.
د دغو سرچینو پر بنسټ، د طالبانو مشر جمعهخان فاتح «یاغي» بللی او د هغه پر ضد یې د اقدام امر صادر کړی دی. د طالبانو په ادبیاتو کې د «یاغي» اصطلاح د داخلي مخالفینو لپاره کارول کېږي، او دې ډلې په تېر کې هم له همدې عنوان څخه د خپلو ناراضه قوماندانانو پر وړاندې کار اخیستی دی.
طالبانو ته نږدې سرچینې وايي چې د جمعهخان فاتح او د دې ډلې د لوړپوړو چارواکو، په ځانګړي ډول د فصیحالدین فطرت، د پوځ د لوی درستیز، ترمنځ څو پړاوه خبرې اترې بې پایلې پای ته رسېدلي او د دې اختلافاتو د حل هڅې له بندښت سره مخ شوي دي.
د سرچینو په وینا، جمعهخان فاتح اوس د طالبانو د مشرۍ له امرونو، په ځانګړي ډول د ملا هبتالله، سرغړونه کوي او تر قوماندې لاندې ځواکونو او درنو نظامي تجهیزاتو ته په تکیې سره د دې ډلې د مشرۍ د پرېکړو پر وړاندې درېږي.
جمعهخان فاتح د بدخشان د درواز په سیمه کې د تاجکتبار طالبانو له مهمو قوماندانانو څخه دی چې شاوخوا ۱۵ کاله مخکې له دې ډلې سره یوځای شوی او د پخواني حکومت پر ضد جګړو کې یې هم رول لرلی دی. هغه په وروستیو کلونو کې په بدخشان کې د طالبانو له اغېزمنو څېرو څخه شوی، او راپورونه ښيي چې د ده د نفوذ له زیاتېدو سره هممهاله، له مرکزي رهبرۍ سره د ده اختلافات هم زیات شوي دي.
سره له دې چې طالبان د داخلي یووالي ادعا کوي، د دې ډلې د یوه پخواني چارواکي د نیولو لپاره د لسګونو نظامي موټرو لېږل، د طالبانو د داخلي اختلافاتو د ژوروالي او د هغې د امنیتي وضعیت پر اغېزو نوې پوښتنې راپورته کړي دي. سرچینې خبرداری ورکوي چې د سیاسي هڅو د ناکامۍ په صورت کې، بدخشان ته د تازه ځواکونو د لېږلو او د دې ترینګلتیا د یوې پراخې نظامي نښتې ته د اوښتو احتمال له پامه نه شي غورځول کېدای.
لیکواله:سلیمه آریایي
